दुबईमा स्वीमिङ पुलमा मज्जा लिँदै गर्दा हृदयघात भई अफ्रिकी मुलुक कङ्गोका एक जना मानिसको मृत्युपछि सल्यानका एक युवकसँग अदालतले झन्डै ७६ लाख रुपैयाँ क्षतिपूर्ति मागेको छ।
सल्यानको त्रिवेणी गाउँपालिका–६ का ३५ वर्षीय युवराज थापा रोजगारीको शिलशिलामा २०७९ सालमा दुबई पुगेका थिए।
थापा होटल हायातको स्वीमिङ पुलमा लाइफ गार्डको रूपमा कार्यरत थिए।
एक दिन होटलमा आएका पाहुनामध्ये एक जना कङ्गोका नागरिक स्वीमिङ पुलमा गएका थिए। ड्युटीमा युवराज थिए। स्वीमिङ गर्दै गरेका ती कङ्गोका नागरिकलाई एकाएक हृदयघात हुन्छ। सोही कारण उनको मृत्यु हुन पुग्छ।
सो घटनापछि मृतकका आफन्तले हायातको स्वीमिङ पुलमा लाइफ गार्डको रूपमा कार्यरत युवराजविरूद्ध दुबई अदालतमा मुद्दा दिन्छन्।
अदालतले युवराजलाई दोषी ठहर गर्दै हालसालै मृतकका हकवालालाई दुई लाख दुबई दिराम, ब्लडमनी बापत बुझाउनु पर्ने फैसला गरेको छ। जसको नेपाली रकम झन्डै ७६ लाख हुन जान्छ।
युवराजको आर्थिक अवस्था कमजोर भएका कारण घर परिवार एक्लैले त्यतिधेरै रकम जम्मा गर्न सक्ने अवस्था छैन।
त्यही भएर ३० मार्चमा युवराजले आफ्नो सामाजिक सञ्जालमार्फत् सबै नेपालीमा सहयोगका लागि याचना गरेका छन्।
युवराजका अनुसार स्वीमिङ पुलमा मज्जा लिँदै गरेका कङ्गोका नागरिकको सन् २०२३ मा हृदयघातका कारण मृत्यु भएको थियो।
घरको आर्थिक अवस्था कमजोर रहेकै कारण विदेश गएका युवराज आफै ठूलो समस्यामा परेको हुँदा सबै नेपालीसँग आफ्नो जीवन रक्षाका लागि सहयोगको याचना गर्न बाध्य भएका हुन्।
कमाउन भनेर दुबई गएका छोरा युवराज आफै समस्यामा परेपछि बुवा मानबहादुर थापाले पनि सहयोगका लागि त्रिवेणी गाउँपालिका पुगेका छन्। त्रिवेणी गाउँपालिकाका अध्यक्ष खिमबहादुर रावतले चैत १९ गते वक्तव्यमार्फत् सबैलाई सहयोगका लागि आग्रह गरेका छन्।
परिबन्धमा परी ठूलो धन राशी तिर्नुपर्ने भएपछि युवराजको जीवन रक्षाका लागि विभिन्न व्यक्तिहरूले स्वइच्छिक रूपमा आर्थिक सहायता गर्न थालेका छन्।
युवराजकी श्रीमती अञ्जना केसी थापाका अनुसार हालसम्म सहयोग स्वरुप ११ लाख जति संकलन भएको छ। अदालतले करिब ६ महिना पहिला नै फैसला गरेको हुँदा ब्लडमनी बुझाउनु पर्ने समय अब झन्डै १ महिना जति मात्रै बाँकी रहेको भन्ने कुरा श्रीमानले गरेको अञ्जनाले बताइन्।
‘मेरो ढाइ र नौ बर्षका गरी दुई साना छोरा छन्,’ उनले भनिन्, ‘विदेशमा उहाँ अप्ठ्यारोमा पर्दा देश समाज सबै गुहार्नु पर्ने अवस्था आइलाग्यो।’
युवराजले पनि सामाजिक सञ्जाल मार्फत सबैसँग सहयोगका लागि याचना गरेका छन्।
‘मेरो स्वभावले सहयोग माग्नेभन्दा सहयोग गर भन्छ तर मेरो आर्थिक स्थितिले सक्दै नसकेपछि सहयोग माग्न बाध्य तुल्यायो,’ युवराजले लेखेका छन्, ‘म अहिले अत्यन्त जटिल अवस्थामा दिन गुजारिरहेको छु। मेरो यो अहिलेको आर्थिक अभाव र मानसिक तनाव कम गर्न सम्पूर्ण नेपाली दाजुभाइ दिदी बहिनीले आर्थिक सहयोग गरेर मलाई उद्धार गर्नु हुनेछ भनेर पूर्ण विश्वास लिएको छु।’
थप अगाडि लेखेका छन्, ‘मलाई सहयोग माग्न रहर थिएन, छैन, होइन। तर म विवश छु। मेरो यो अवस्था सबै जनाले बुझ्नुहुन्छ भन्ने पूर्ण विश्वास राखेको छु। म अहिले मेरो देश नेपाल खोजिरहेको छु। आशा छ मेरो देशले आफ्नो नागरिक अवश्य खोज्नेछ।’
