कोहलपुरका एक व्यवसायीलाई धम्क्याउँदै पाँच करोड भारु मागेको आरोपमा प्रहरीले एक जनालाई पक्राउ गरी सार्वजनिक गरेको छ।
सुर्खेतको भेरीगंगा नगरपालिका–७, काठेपारी घर भई बाँकेको कोहलपुर नगरपालिका–५ मा कोठा भाडामा बस्दै आएका ४९ वर्षीय रामबहादुर बुढा क्षेत्री पक्राउ परेका हुन्।
इलाका प्रहरी कार्यालय कोहलपुरका प्रमुख डिएसपी धर्मराज भण्डारीका अनुसार पक्राउ परेका क्षेत्रीले विभिन्न विदेशी नम्बरको ह्वाट्सएप खोलेर त्यसको दुरूपयोग गर्दै विभिन्न व्यवसायीहरूलाई रकम माग्दै धम्क्याउने गरेका थिए।
क्षेत्रीले आफूलाई लरेन्स बिस्नोई र अनमोल बिस्नोई भन्दै विभिन्न व्यवसायीहरूलाई म्यासेज पठाई ठूलो रकम माग्दै धम्क्याउने गरेको खुलेको छ। व्यवसायीको गुनासोका आधारमा प्रहरीले अनुसन्धान सुरू गरेको थियो।
अनुसन्धानबाट क्षेत्रीले आफूलाई लोरेन्स र अनमोल बिस्नोई भएको भन्दै विभिन्न व्यक्तिहरूलाई धम्की दिएर ठूलो रकम माग्ने गरेको तथा नदिए ज्यान लिने सम्मका धम्की दिएको देखिएको डिएसपी भण्डारीले बताए।
लरेन्स बिस्नोई एक भारतीय ग्याङस्टर हुन्। जो फिरौती माग्ने तथा हत्या आरोपमा सन् २०१४ देखि भारतीय कारागारमा जीवन बिताइरहेका छन्। उनी माथि २९ मे २०२२ मा पञ्जाबी गायक सिद्दु मुसलेवालाको हत्या, भारतीय अभिनेता सलमान खानलाई ज्यान मार्ने उद्योगको प्रयास, बाबा सिद्दिकीको हत्या गरेको जस्ता अभियोग छन्।
अनमोल भने लरेन्सका भाइ हुन्। अनमोलले पनि दाइ लोरेन्स कारागारमा रहेको समयमा विभिन्न व्यक्तिहरूलाई धम्क्याउँदै पैसा माग्ने गर्थे।
लरेन्स र अनमोलको नाम लिएर विभिन्न व्यक्तिहरूलाई सामाजिक सञ्जालको दुरूपयोग गरी ठूलो मात्रामा धनराशी माग्ने तथा नदिए ज्यान मार्ने धम्की दिने सुर्खेतका ४९ वर्षीय रामबहादुर बुढा क्षेत्रीको पृष्ठभूमि पनि हत्या लगायत विभिन्न आपराधिक घटनामा जोडिएको छ।
इलाका प्रहरी कार्यालयका प्रहरी निरीक्षक हरि भट्टराईका अनुसार रामबहादुरविरूद्ध इलाका प्रहरी कार्यालय छिन्चु सुर्खेतमा कर्तव्य ज्यान मुद्दा चलेको थियो।
२०६४ चैत २७ गते भएको संविधान सभा निर्वाचनका क्रममा संविधान सभाका उम्मेदवार ऋषि शर्मामाथि गोली हानेको मुद्दामा कर्तव्य ज्यान मुद्दा चलेको थियो।
सुर्खेतको मेहलकुना जहरेबजार नजिकै लोभे भन्ने स्थानमा उनीमाथि गोली प्रहार भएको थियो।
शर्माको हत्या भएपछि रामबहादुर माथि कर्तव्य ज्यान मुद्दा चलेको थियो।
त्यसपछि २०६५ साल चैतमा द्धन्द पीडित सेना प्रहरीको आन्दोलनमा हतियार खोसेको आरोपमा काठमाडौंमा मुद्दा चलेको थियो।
त्यस्तै कोटेश्वरको निखिलेश्वर मन्दिरमा शक्तिबहादुर बस्नेतलाई गोली हानेको आरोपमा उनी पक्राउ परेका थिए।
५ वर्ष कैद र ६० हजार जरिवाना अदालतले तोकेको थियो। तोकिएको जेल सजाय भुक्तान गरी रामबहादुर २०७० फागुन २८ गते छुटेका थिए।
रामबहादुरविरूद्ध महानगरीय परिसर काठमाडौंमा २०६४ भदौ ९ गते मुद्दा गलेको थियो। व्यक्तिलाई नियन्त्रणमा लिएर फिरौती असुल गरेको अभियोगमा मुद्दा चलेको थियो।
त्यस्तै झापामा २०६२ चैत ८ गते सर्वसाधरणबाट चन्दा असुल गरेको अभियोगमा मुद्दा चलेको थियो।
त्यसअघि इप्रका काकडभिट्टामा २०६१ साउन २७ मा विवाह गर्ने भन्दै नेपाली युवतीलाई भारत पुर्याएको भन्दै जिउ मास्ने बेच्ने उद्योगमा मुद्दा चलेको थियो।
प्रहरीका अनुसार रामबहादुर २०५१ सालमा नेपाल आर्मीमा भर्ना भएका थिए। आर्मीको जागिर गर्दागर्दै उनी भागेका थिए।
त्यसयता उनले खासै कुनै काम गरेको देखिँदैन। बरू कहिले कुनै र कहिले कुन समूहमा जोडिएर देशका विभिन्न स्थानमा आपराधिक क्रियाकलाप गर्ने गरेको प्रहरी निरीक्षक भट्टराईले बताए।
अन्य केही व्यापारीले पनि आफूहरूलाई यस्तै खाले धम्कीका म्यासेजहरू आएको खबर गरेको प्रहरी निरीक्षक भट्टराईले बताए।
-1743574521.jpg)
