काठमाडौंको तीनकुनेमा भएको हिंसात्मक घटनामा गोली लागेर घाइते भएका रेबिका खत्रीको न्याय माग गर्दै विद्यार्थीहरूले प्रदर्शन गरेका छन्।
मंगलबार कोटेश्वर बहुमुखी क्याम्पसका विद्यार्थीहरूले प्रदर्शन गरेका हुन्।
बिबिएस तेस्रो वर्षमा अध्ययनरत २२ वर्षीया रेविका खत्रीको दायाँ खुट्टामा रबरको गोली लागेको जिल्ला प्रहरी परिसर काठमाडौंका एसएसपी विश्व अधिकारीले जानकारी दिए।
उनलाई कसरी गोली लागेको भन्ने विषयमा बुझ्ने काम भइरहेको उनले बताए।
‘हुलमूलमा उहाँलाई गोली लागेको हुनसक्छ। कसरी भएको हो भन्नेबारे हेर्दैछौं,’ उनले भने।
उनका अनुसार अहिलेसम्म चार जनालाई गोली लागेको विवरण छ। अन्तिम विवरण संकलन गर्ने काम भइरहेको पनि उनले बताए।
घाइते खत्रीको सिभिल अस्पतालमा उपचार भइरहेको छ।
मंगलबार विद्यार्थीहरूले न्याय र दोषीलाई कडाभन्दा कडा कारबाही गर्न माग राखेर प्रदर्शन गरेका हुन्। खत्रीलाई उनकै निवास नजिकै गोली लागेको भनिएको छ। यद्यपि यसबारे यकिन भने भइसकेको छैन।
नेपाल प्रहरीले सोमबार गोली लागेर तीन जना घाइते भएको विवरण संकलन भएको बताएको थियो। जसमध्ये एक जना सविन महर्जनको मृत्यु भएको थियो।
यस्तै शम्भु दर्जी र डिल्लीप्रसाद लुइँटेल पनि गोली लागेर घाइते भएका हुन्। उनीहरूको उपचार भइरहेको छ।
तस्बिरहरू:
सबै तस्बिर: नेपाल फोटो लाइब्रेरी
