बाजुरामा चितुवाको आक्रमणबाट एक बालकको मृत्यु भएको छ।
जिल्लाको खप्तड छेडेदह गाउँपालिका – ३ धुर्तोलाका ८ वर्षीय विजय रावतलाई आइतबार बेलुकी सात बजेतिर चितुवाले घरको आँगनबाट आक्रमण गरी लगेको थियो।
घरको आँगनमा रहेको पानी धारामा गएको समयमा चितुवाले बिजयलाई आक्रमण गरेको देखेपछि स्थानीयले हल्ला खल्ला गरेका थिए।
चितुवाले एउटा खुट्टा खाएको अवस्थामा करिब डेढ सय मिटर टाढा बालक विजयको शव फेला परेको बाजुराका प्रहरी प्रमुख डिएसपी दिलिपकुमार गिरीले बताए।
‘यो ठूलो बाघ आउने ठाउँ हैन,’ गिरीले भने, ‘त्यो चितुवा नै हुनुपर्छ भन्ने अनुमान छ।’
सोमबार बिहान मुचुल्का बनाइ शव पोष्टमर्टमका लागि अस्पताल ल्याउनका लागि प्रहरी खटिएको डिएसपी गिरीले बताए।
चितुवाको आक्रमणबाट मृत्यु भएका विजय स्थानीय दिल्लीबहादुर रावतको छोरा रहेको डिएसपी गिरीले बताए।
