अमेरिकी राष्ट्रपति डोनाल्ड ट्रम्पसँगको निकट रहेर राजनीतिमा होमिएका कारण ठूलो आर्थिक नोक्सानी हुन थालेपछि इलन मस्कले मे महिनापछि डिपार्टमेन्ट अफ गभर्न्मेन्ट इफिसिएन्सी (डोज) छोड्ने संकेत गरेका छन्।
ट्रम्पनिकट फक्स न्यूज टेलिभिजनसँग कुरा गर्दै टेस्ला कम्पनीका मालिक मस्कले अमेरिकी संघीय सरकारको खर्च १० खर्ब डलरले घटाउने काम ६४ दिनभित्रै सम्पन्न गर्ने घोषणा गरेका छन्।
अहिले लगभग ७० खर्ब डलर रहेको संघीय खर्च घटाएर ६० खर्ब डलरमा झार्नेमा विश्वस्त रहेको उनले बताएका छन्।
जनवरी २० मा दोस्रो कार्यकाल सुरू गरेका ट्रम्पले मस्कलाई डोज प्रमुख बनाउँदा खर्च कटौतीका लागि १३० दिनको सीमा तोकेका थिए। यसको मतलब उनको कार्यकाल मे महिनाको अन्त्यसम्ममा समाप्त हुन सक्छ।
'मलाई लाग्छ हामीले त्यो समय सीमाभित्र घाटा १० खर्ब डलरले घटाउन आवश्यक अधिकांश काम सम्पन्न गर्नेछौं,' मस्कले उनको कार्यकाल र कटौती लक्ष्य कति चाँडो हासिल गर्ने अपेक्षा छ भन्ने प्रश्नको जबाफमा भने।
'सरकार प्रभावकारी छैन, र यहाँ धेरै फजुल खर्च र ठगी छ, त्यसैले हामी विश्वस्त छौं कि १५ प्रतिशत कटौती महत्वपूर्ण सरकारी सेवाहरूलाई असर नगरी गर्न सकिन्छ,' मस्कले थपे।
डोजले मार्च २४ सम्ममा कर्मचारी संख्या घटाउने, सम्पत्ति बिक्री र सम्झौता रद्द गर्ने जस्ता कार्यहरूमार्फत् अमेरिकी करदाताहरूको करिब १ खर्ब १५ अर्ब डलर जोगाएको दाबी गरेको छ। तर उसले दाबी गरेको रकम जोगाएको पुष्टि हुने कुनै आधार नभएको भनेर विभिन्न अमेरिकी मिडियाले लेखेका छन्।
मस्कले ट्रम्पलाई चुनाव जिताउन २५ करोड डलरभन्दा बढी खर्च गरेका थिए।
उनले एक्सलाई पनि ट्रम्पको समर्थनमा परिचालन गरेका थिए।
मस्कको गुन तिर्न ट्रम्पले उनलाई डोज (डिपार्टमेन्ट अफ गभर्न्मेन्ट इफिसिएन्सी) प्रमुखमा नियुक्त गरेका छन्।
ट्रम्पको मन्त्री चयनदेखि लिएर विदेशी सरकार प्रमुखहरूसँगको छलफलमा पनि मस्क सहभागी भएका थिए। चुनावअघि नै ट्रम्पले सरकारी सेवा चुस्त बनाउन मस्कको नेतृत्वमा एउटा निकाय बनाउने घोषणा गरेका थिए।
चुनाव जितेपछि नोभेम्बरमै सो विभागको घोषणा गर्दा मस्क त्यसको प्रमुख भनेर खुलाएका थिए। सो विभागले युएसएआइडी लगायत धेरै अमेरिकी सरकारी कार्यालयमा आतंक मच्चाएको छ। त्यस्तै हजारौं सरकारी कर्मचारीलाई निष्कासन गरेको छ भने अर्बौं डलरको सरकारी बजेट रोकेको छ।
त्यसैले अहिले डोज र मस्कविरूद्ध धेरै मुद्दा परेका छन्। यसरी ट्रम्पलाई समर्थन गर्दै, उनको शासनमा संलग्न हुँदै अमेरिका र युरोपको राजनीतिमा समेत हस्तक्षेप गर्न थालेपछि मस्कलाई आर्थिक नोक्सानी समेत हुन थालेको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
