म्यान्मारमा शुक्रबार गएको शक्तिशाली भुइँचालोमा परेर कम्तिमा १५ जना नेपालीभाषीको मृत्यु भएको अनुमान गरिएको छ।
अखिल म्यान्मार देशीय गोर्खा हिन्दु धार्मिक संघका अध्यक्ष सागर घिमिरेले अहिलेसम्म नेपालीभाषी समुदायमा कति क्षति भयो भन्ने यकिन तथ्यांक नआए पनि कम्तिमा १५ जनाको ज्यान गएको हुनसक्ने बताए। यो म्यान्मारमा रहेका नेपालीभाषीहरूको साझा संस्था हो।
शुक्रबार दिउँसो राजधानी नेपिडो आसपास केन्द्रविन्दु भएर ७.७ म्याग्निच्युडको भुइँचालो गएको थियो। अहिलेसम्म मृत्यु हुनेको संख्या हजार नाघेको छ। साढे दुई हजारभन्दा बढी गम्भीर घाइते भएका छन्।
भुइँचालोले भत्काएका घरहरूले ठूलो संख्या मान्छेहरू पुरिएको बताइएको छ। उनीहरूलाई भग्नावशेषबाट उद्धार गर्ने प्रयास जारी छ। मृत्यु हुनेको संख्या अझै बढ्न सक्ने अन्तर्राष्ट्रिय सञ्चार माध्यमहरूले जनाएका छन्।
अध्यक्ष घिमिरेका अनुसार माण्डले, नेपिडो र सगाईं क्षेत्रमा ठूलो क्षति भएको छ।
उनले नेपालीभाषी समुदाय रहेका विभिन्न ठाउँमा सम्पर्क गरेर क्षतिको विवरण बुझ्ने काम भइरहेको जानकारी दिए। माण्डलेमै ८-१० जना नेपालीभाषीको ज्यान गएको हुनसक्ने उनले बताए।
'भर्खर माण्डलेमा सम्पर्क भएअनुसार नेपालीको एउटा घर भत्किएको छ। घरधनी गिरी सापकोटाको ज्यान गएको र परिवारका अरू सदस्य सुरक्षित छन् भन्ने थाहा भयो,' उनले भने, 'अर्का एक जना रवि सिम्खडाले पनि घर भत्किएर ज्यान गुमाएको बुझिन्छ। उनको परिवार पनि सुरक्षित छ।'
अर्को एउटा नेपाली परिवार घरभित्र थिचिएको र एकै ठाउँमा ५-६ जनाको ज्यान गएको उनले बताए।
'त्यहाँ त शव निकाल्नै गाह्रो परेको छ, बल्लतल्ल एक जनाको शव निकालियो,' उनले भने।
यो भुइँचालोले थाइल्यान्डमा पनि क्षति पुगेको छ। बैंककमा निर्माणधीन ३० तले भवन ढल्दा त्यहाँ कार्यरत मजदुरहरू पुरिएका छन्। तीमध्ये केही मजदुर अझै जीवितै रहेको र उद्धारको प्रयत्न भइरहेको बिबिसीले उल्लेख गरेको छ।
शुक्रबार दिउँसो तीन बजे ७.७ म्याग्नेच्युडको भूकम्प गएपछि ६.२ म्याग्नेच्युडको अर्को परकम्प गएको थियो।
