काठमाडौं महानगरपालिकाले तीनकुने-कोटेश्वर-जडिबुटी क्षेत्रमा दुर्गा प्रसाईंको आह्वानमा शुक्रबार राजावादीहरूले गरेको प्रदर्शन, तोडफोड र आगजनीबाट पुगेको क्षतिको विवरण संकलन गरिरहेको छ।
शनिबार बिहानैदेखि महानगरपालिकाको टोली खटिएर क्षतिको विवरण संकलन गरेको मेयर बालेन शाहको सचिवालयले जानकारी दिएको छ।
राजावादी प्रदर्शनकारीहरूले सरकारी तथा निजी सम्पत्तिमा क्षति पुर्याएका थिए। राजावादी प्रदर्शनकारीहरूले महानगरपालिकाको सम्पत्ति, फोहोर गरेको, आयरल्याण्ड भत्काएको, दमकल तोडफोड, चालकलाई घाइते बनाएका लगायतका विवरण संकलन भएका छन्।
‘कति क्षति भएको छ भनेर रिपोर्ट आइसकेको छ। अहिले कसलाई जरिवाना कति तिराउने भन्नेबारे पनि छलफल भइरहेको छ,’ स्रोतले भन्यो, ‘केहीबेरमा यसको यकिन विवरण आउँछ।’
उनका अनुसार जरिवाना अनुमानित १० लाख हुन सक्छ।
महानगरपालिकाको टोलीले शुक्रबार राति नै क्षतिको विवरण संकलन गर्न खोजे पनि अबेरसम्म पनि प्रदर्शन भइरहेकै कारणले शनिबार बिहान मात्रै काम सुरू भएको थियो।
महानगरपालिकाकाले शनिबार बिहान सडकमा रहेका फोहोर पनि सरसफाइ गरिसकेको जनाएको छ।
