नेपाल स्काउटमा देखिएको विवाद समाधानका लागि युवा तथा खेलकुद मन्त्रालयले समिति गठन गर्ने भएको छ।
केही समययता नेपाल स्काउटको प्रधान कार्यालयमा देखिएको विवाद र भइरहेको आन्दोलनको अध्ययन गर्न मन्त्रालयले पाँच सदस्यीय समिति गठन गर्न लागेको हो।
स्काउटले विज्ञप्ति जारी गरी पाँच सदस्यीय समितिको नेतृत्व मन्त्रालय मातहतकै कर्मचारीले गर्ने जनाएको छ। समितिमा दुई जना सदस्य मन्त्रालयका कर्मचारी र एक जना आन्दोलन पक्षका कर्मचारी रहने स्काउटले जनाएको छ।
मन्त्रालयले आन्दोलन गरिरहेको ‘नेपाल स्काउट शद्धीकरण अभियान’लाई एक पत्र पठाउँदै अनसनलगायतका आन्दोलनका सबै कार्यक्रम फिर्ता लिन आग्रह गरेको छ।
समितिमा रहने उसले अध्ययन समितिमा हरने एक जना प्रतिनिधि तोकेर सहयोग गर्न पनि आग्रह गरेको छ।
मन्त्रालायले लेखेको सो पत्र शुक्रबार मन्त्रलायका सहसचिव रामचरित्र मेहताले नेपाल स्काउटका प्रमुख आयुक्त देवराज घिमिरे र आयुक्त एवम् सहजीकरण समितिका संयोजक सन्तोष कुमार थापाको रोहबरमा ‘नेपाल स्काउट शद्धीकरण अभियान’का प्रतिनिधिलाई बुझाएको नेपाल स्काउटले जनाएको छ।
नेपाल स्काउट सदैव संवादबाट समस्याको समाधान गर्न तयार रहेको र यसै सन्दर्भमा मन्त्रालयले गठन गरेको अध्ययन समिति मार्फत पछिल्लो समय देखिएको समस्या यथासिघ्र समाधान हुने कुरामा दृढ रहेको नेपाल स्काउटले जनाएको छ।
