राष्ट्रिय प्रजातन्त्र पार्टी (राप्रपा) ले बिहीबार काठमाडौंको माइतीघरमा प्रदर्शन गर्यो।
सरकारले नेपाल विद्युत प्राधिकरणको कार्यकारी निर्देशकबाट कुलमान घिसिङलाई हटाएको विरोधमा राप्रपाका केही नेताहरूले प्रदर्शन गरेका हुन्।
प्रदर्शनमा राप्रपाका खुस्बु ओली लगायतका नेताहरू सहभागी थिए।
त्यही प्रदर्शनमा एक जना विदेशी नागरिक पनि देखिए। ढाकाको दौरा सुरूवाल र ढाका ढोपी, निधारमा टीका लगाइएका ती विदेशी नागरिकले कुलमानको समर्थन गरेको प्लाकार्ड पनि बोकेका थिए।
प्रदर्शनकै क्रममा प्रहरीले उनलाई नियन्त्रणमा लिएको छ।
जिल्ला प्रहरी परिसर काठमाडौंका एसपी अपिलराज बोहराका अनुसार उनी अमेरिकी नागरिक हुन्। ५८ वर्षीय जुलियन क्रिपा ब्लिस नाम गरेका अमेरिकी नागरिकलाई अहिले परिसरले नियन्त्रणमा लिएको हो।
प्रहरीले उनी नेपाल आएको विवरण पनि खोजी गरेको छ। उनी पर्यटक भिसामा नेपाल आएको देखिन्छ।
गत जनवरी १८ मा आएका उनको सुरूमा १५ दिनको भिसा प्राप्त भएको देखिन्छ। फेब्रुअरी ३ मा उनको भिसा अवधि सकिएको थियो।
उनले पुन: फेब्रुअरी १९ देखि मार्च २४ सम्म ३४ दिनको भिसा अवधि थप गरेको फेला परेको हो। उनको भिसा अवधि सकिएकाले अध्यागमन विभाग पठाइने एसपी बोहराले बताए।
-1743061812.jpg)
