जिल्ला प्रशासन कार्यालय सल्यानमा सेवा लिन पुगेका एक जना सेवाग्राहीको मृत्यु भएको छ।
बिहीबार बिहान करिब ११ बजेतिर बागचौर नगरपालिका वडा नम्बर ७ पैय्याचौरका ७० वर्षीय टीकाराम ओलीको मृत्यु भएको जिल्ला प्रहरी कार्यालय सल्यानका प्रहरी निरीक्षक बाबुराम बस्नेतले जानकारी दिए।
उनी राष्ट्रिय परिचय पत्र लिनका लागि प्रशासन कार्यालयमा पुगेका थिए। उनको साथमा भान्जीज्वाइँ पनि थिए।
कार्यालयमा उभिएका उनी एक्कासि लडेका थिए। तत्कालै उनलाई जिल्ला अस्पतालमा उपचारका लागि लगिएको प्रहरी निरीक्षक बस्नेतले बताए।
उनका अनुसार अस्पतालमा पुर्याएलगत्तै चिकित्सकले ओलीलाई मृत घोषणा गरेको थियो। उनी दम, रक्तचापको बिरामी थिए। उनको मृत्युको कारण खुलिसकेको छैन।
शवको पोष्टमर्टमपछि मात्रै कारण खुल्ने प्रहरीले जनाएको छ। शव पोष्टमर्टमको लागि अस्पतालमा राखिएको छ।
