मकवानपुरमा खुकुरी प्रहार गरी एक महिलाको हत्या भएको छ।
बुधबार मकवानपुरको हेटौंडा उपमहानगरपालिका-१ चौकीटोलकी ३५ वर्षीय गुडिया दासको हत्या भएको हो।
बुधबार बेलुकी ९ बजे उनी आफ्नै घरको दोस्रो तलामा मृत भेटिएकी थिइन्। उनको टाउकोमा धारिलो हतियार प्रहार भएको देखिने चोट रहेको जिल्ला प्रहरी कार्यालय मकवानपुरका निमित्त सूचना अधिकारी इन्स्पेक्टर ठाकुरप्रसाद सापकोटले जानकारी दिए।
उनका अनुसार राति मृत भेटिएको घरमा दिउँसै प्रहरी पुगेको थियो।
दिउँसो करिब ४:१० बजे सोही घरका २८ वर्षीय रूपेश दासमाथि उनकै भाइ २२/२३ वर्षका राहुल भन्ने रमेश दासले खुकुरी प्रहार भएको खबर प्रहरीले पाएको थियो।
त्यसपछि उक्त घरमा प्रहरी पुग्दा रूपेसको टाउको, दाहिने हात, करङलगायतका भागमा खुकुरी प्रहार भएको गम्भीर घाइते अवस्थामा भेटिएका थिए।
उनका भाइ रमेशलाई प्रहरीले धारिलो हतियारसहित सोही स्थानबाट नियन्त्रणमा लिएको थियो। गम्भीर घाइते भएका रूपेशलाई अस्पताल पठाएर रमेशलाई जिल्ला प्रहरी कार्यालय पुर्याइएको थियो।
तर राति ९ बजे गुडिया घरकै दोस्रो तल्लामा मृत भेटिएको भन्ने सूचना पाएपछि प्रहरी पुनः सोही घरमा गएको थियो।
इन्स्पेक्टर सापकोटाका अनुसार प्रहरी पुग्दा दोस्रो तल्लामा गुडिया मृत भेटिएकी थिइन्। उनी रुपेश र रमेशका जेठी भाउजु हुन्।
प्रारम्भिक अनुसन्धानका क्रममा रमेशले नै आफ्नी जेठी भाउजुमाथि धारिलो हतियार प्रहार गरी हत्या गरेको खुल्न आएको इन्स्पेक्टर सापकोटाले बताएका छन्।
भाउजुको हत्यापछि उनी माइला दाइ रूपेशमाथि जाइलागेका थिए।
घरायसी विवादका कारण घटना भएको पनि प्रहरीले जनाएको छ।
गुडियाको शव घरमै छ। उनको माइती पक्ष आएपछि थप प्रक्रिया पुर्याएर पोस्टमर्टका लागि पठाइने इन्स्पेक्टर सापोकटाले जानकारी दिए।
