सुनसरीको इटहरी चोकबाट दुई सय मिटर पूर्वमा रहेको ९ तले भवन सेन्ट्रल प्लाजामा आगलागी भएको छ।
बुधबार बिहानदेखि आगलागी भइरहेको यो भवनको छैटौं तलाभन्दा माथि होटल बरण्डा सञ्चालनमा छ।
छैटौं तलामा होटलको रेष्टुराँ, किचन छ भने भने सातौं, आठौं तलामा होटलका कोठा छन्।
राजेश श्रेष्ठले सञ्चालन गर्ने यो होटलको अफिस भने पाँचौं तलामा छ। यही तलाबाट बुधबार आगलागी सुरू भएको थियो।
बरण्डा होटलका सञ्चालक राजेश श्रेष्ठले दिएको जानकारी अनुसार बिहान साढे आठ बजेतिर होटलका कर्मचारी अफिस कक्षमा पुगेका थिए। अफिसको ढोका खोलेर भित्र पस्दा कोठा धुँवाले भरिएको देखियो।
‘कर्मचारीहरूले अफिस खोलेछन्, त्यसबेला पूरै कोठा धुँवाले भरिएको पाएछन्’, श्रेष्ठले भने, ‘त्यसपछि कर्मचारीहरूले होहल्ला गरे। दमकल बोलाए तर आगो छिटो फैलियो।’
बरण्डा होटलको छैटौं तलामा रहेको रेष्टुराँ, किचन र पाँचौं तलामा रहेको अफिस जलेर नष्ट भएको श्रेष्ठले जानकारी दिए।
‘अहिले अग्निनियन्त्रक र सुरक्षाकर्मीहरू भित्र पस्न सक्ने अवस्था भएको छ, त्यसैले आगो अलि घटेको जस्तो देखिएको छ’, श्रेष्ठले भने, ‘तर हामी त भित्र जान सकेका छैनौं।’
उनका अनुसार अहिलेसम्म आगो सातौं तलामा पुगेको छैन।
इटहरी ६ का वडाध्यक्ष दिवस पोखरेल र मेयर हेमकर्ण पौडेलको सचिवालयले आगो विस्तारै नियन्त्रणमा आइरहेको जानकारी दिएका छन्।
आगलागी भएको सेन्ट्रल प्लाजाबाट ११ जनाको उद्धार भएको छ।
गृहमन्त्री रमेश लेखकको सचिवालयका अनुसार अहिलेसम्म ११ जनाको उद्धार भएको हो। नेपाली सेनाको हेलिकप्टर पनि घटनास्थल पुगेर फर्केको छ। अहिले प्लाजाभित्र अन्यको खोजी तथा उद्धार गर्ने प्रयास जारी रहेको प्रहरीले जनाएको छ।
घटनास्थलमा नेपाल प्रहरी, सशस्त्र प्रहरी बल र नेपाली सेनाका ३२२ जनाको टोली खटिएका छन्।
विभिन्न पालिकाका १२ वटा दमकल पनि घटनास्थलमा छन्।
विराटनगर इटहरी चोकबाट पूर्व काँकडभिट्टा रोडको उत्तरतर्फ रहेको सेन्ट्रल प्लाजाको पाँचौ तलाबाट आगलागी सुरू भएको थियो।
नौ तलाको यो भवनमा होटेल वरन्डा, वरन्डाको रेस्टुरेन्ट, क्युएफेक्स्को सिनेमा हल, सनराइज बैंक, क्याफे, मोबाइल सर्भिस सेन्टर, पसलहरू छन्।
आगलागी के कारणले सुरू भएको भन्ने खुलिसकेको छैन।
