युक्रेनमा युद्ध रोक्नेबारे अमेरिका र रूसले साउदी अरबमा वार्ता सुरू गरेका छन्।
अन्तर्राष्ट्रिय समाचार संस्था रोयटर्सका अनुसार सोमबार युक्रेनमा युद्ध रोक्नेबारेमा वार्ता सुरू भएको हो।
वासिङटनले भने बृहत सम्झौतामा सहमति जनाउनुअघि ब्ल्याक सीमार्फत हुने ढुवानीको सुरक्षा सुनिश्चितता गर्ने विषयमा सहमति खोजेको छ। यद्यपि यो क्षेत्रमा पछिल्ला केही महिनामा युद्ध भएको छैन।
गत बिहीबारमात्रै ट्रम्प र युक्रेनी राष्ट्रपति भोलोदिमिर जेलेन्सीबीच एक घण्टा लामो कुराकानी भएको थियो। ह्वाइट हाउसमा चर्काचर्कीपछि पहिलो पटक दुई जनाबीच फोनवार्ता भएको थियो।
वार्तामा अमेरिकाको तर्फबाट ह्वाइट हाउस नेशनल सेक्युरिटी काउन्सिलका सिनियर डाइरेक्टर एन्ड्रिउ पीकले नेतृत्व गरेका छन्। उनीसँगै स्टेट डिपार्टमेन्टका वरिष्ठ अधिकारी माइकल एन्टन पनि सहभागी छन्।
रूसको तर्फबाट पूर्व-कूटनीतिज्ञ एवं रूसको माथिल्लो सदनका परराष्ट्र कमिटीका अध्यक्ष ग्रेगोरी कारासीनले वार्ता गरिरहेका छन्। फेडेसल सेक्युरिटी सर्भिसका डाइरेक्टरका सल्लाहकार सर्जेइ बिसिडा पनि वार्तामा छन्।
आफू पदमा आएदेखि नै रूस-युक्रेनबीचको युद्ध रोक्ने वाचा गर्दै आएका ट्रम्प पछिल्लो समय वार्ताबारे भएको विकासक्रममा सन्तुष्ट देखिएका छन्। पुटिनको सक्रियताबारे पनि उनले तारिफ गर्दै आएको रोयटर्सले जनाएको छ।
पुटिनले शान्ति सम्झौता गर्न तयार रहेको बताउँदै आएको छ। तर युक्रेनले नेटोको सपना छाड्नुपर्ने र रूसले दावी गरेको चार युक्रेनी क्षेत्रबाट युक्रेनी सेनालाई फिर्ता बोलाउनुपर्ने शर्त राखेका छन्।
ब्ल्याक सीको सहमति पछि दुई पक्षले लाइन अफ कन्ट्रोलबारे छलफल गर्ने जनाएको छ।
युद्धविराम रोक्नेबारे छलफल र खनिज सम्झौता गर्न जेलेन्स्की ट्रम्पलाई भेट्न फेब्रुअरी २८ मा ह्वाइट हाउस पुगेका थिए।
त्यहाँ ट्रम्प र उनका उपराष्ट्रपति जेडी भान्सबीच चर्काचर्की गरेर जेलेन्स्की फर्किएका थिए। त्यतिबेला खनिज सम्झौतामा हस्ताक्षरको कार्यक्रम स्थगित गरी जेलेन्स्कीलाई ह्वाइट हाउसबाट बाहिरिन निर्देशन दिइएको थियो।
ट्रम्प र जेलेन्स्कीको व्यक्तिगत संवाद रोकिए पनि साउदी अरबमा अमेरिकी अधिकारीहरूले युक्रेनी अधिकारीहरूसँग वार्ता गरेका थिए।
त्यही वार्तामा युक्रेनमा ३० दिनको अस्थायी युद्धविराम गर्ने ट्रम्पको प्रस्तावलाई युक्रेनले स्वीकार गरेको थियो। युक्रेनले अस्वीकार गरेपछि ट्रम्पले पुटिनलाई मनाउन लामो फोनवार्ता गरेका थिए।
२ घन्टा लामो संवादपछि पनि पुटिनले ३० दिनको युद्धविराम गर्न तयार नभएको बरू युक्रेनी उर्जा पूर्वाधारमा आक्रमण रोक्न सकिने जबाफ ट्रम्पलाई दिएका थिए।
पुटिनले ३० दिनसम्म युद्धविराम गरे युक्रेनले हतियार जम्मा गर्ने र थप सहायता जुटाएर पछि युद्धविरामका लागि आफ्ना मागहरू बढाउन सक्ने चुनौती रहेको बताएका थिए।
-1742801159.jpg)
