बाँकेको डुडुवा गाउँपालिका–२ बेतहनीमा पानी बोक्ने ट्यांकरले ठक्कर दिँदा दाजुभाइको मृत्यु भएपछि तनावग्रस्त बनेको बेतहनी अझै शान्त बनेको छैन।
स्थानीय ७ वर्षीय शिव गोडिया र ९ वर्षीय उनका दाजु विशाल गोडिया स्कुलबाट घर फर्किंदा बेतहनी चोकमा भे १ ख ४१०७ नम्बरको ट्यांकरले ठक्कर दिएको थियो।
घटनास्थलबाट स्थानीयले शव उठाउन दिएका छैनन्। स्थानीयका अनुसार दुवै जना बेतहनीको नौरीगढी एकेडेमीमा एलकेजीमा अध्ययनरत थिए।
घटनालगत्तै आक्रोशित स्थानीयले पानी बोक्ने ट्यांकरमा आगो लगाएका थिए। उक्त ट्यांकर पूर्ण रूपमा जलेर नष्ट भएको छ।
चालकलाई लुकाएको भन्दै स्थानीयले बेतहनी प्रहरी चौकीमा समेत आगजनी गरेका छन्।
उक्त आगजनीबाट प्रहरी चौकी, प्रहरीका मोटरसाइकल पनि जलेको जिल्ला प्रहरी कार्यालय बाँकेका निमित्त प्रहरी निरीक्षक यमबहादुर मल्लले सेतोपाटीलाई बताए।
तनाव शान्त पार्न प्रहरी प्रमुख एसपी तुलबहादुर खत्री आफैले घटनास्थल नियन्त्रणमा लिन खटिएका छन्।
‘मुश्किलले ज्यान जोगाइयो,’ सई मनी लामिछानेले भने, 'आक्रोशित स्थानीयको आगजनीबाट प्रहरी चौकी पूर्ण रूपमा ध्वस्त भएको छ।’
तनावपूर्ण स्थिति नियन्त्रणमा लिन प्रहरीले केही राउण्ड हवाई फायर गरेको स्थानीय प्रशासनले जनाएको छ।
दुर्घटनालगत्तै ट्यांकर चालक राप्ती सोनारी गाउँपालिका– ४ पर्सरामपुरका २२ वर्षका कर्णबहादुर बुढामाथि आक्रोशित भीडले कुटपिट गरेको थियो।
घटना थाहा पाएलगत्तै बेतहनी प्रहरी चौकीका प्रहरीले चालकलाई पक्राउ गरेको थियो। त्यसपछि आक्रोशित भीडले चालकलाई लुकाएको र दोषी चालक आफूलाई बुझाउन माग गर्दै चौकीमा आगो लगाएका थिए।
आक्रोशित स्थानीयबाट जोगाएर प्रहरीले चालकलाई नेपालगञ्जस्थित जिल्ला प्रहरी कार्यालय बाँके पुर्याइसकेको छ।
प्रहरीका अनुसार चालकमाथि पनि कुटपिट भएको छ। कुटपिटबाट अनुहार तथा शरीरका विभिन्न भागमा चोटपटक लागेको छ।
चालक बुढाले अचानक दुई बच्चा अगाडि आएको र ब्रेक नलागेको हुँदा दुर्घटना भएको प्रहरी समक्ष बयान गरेका छन्।
घटनाबारे थप अनुसन्धान हुन बाँकी रहेको प्रहरीले जनाएको छ।
यो पनिः
बाँकेमा पानी बोक्ने ट्यांकरको ठक्करबाट दुई बालकको मृत्युपछि तनाव
-1742801159.jpg)
