अमेरिकी राष्ट्रपति डोनाल्ड ट्रम्पले आफ्ना पूर्व प्रतिद्वन्द्वी कमला ह्यारिस र हिलारी क्लिन्टनको सुरक्षा स्वीकृति (सेक्युरिटी क्लियरेन्स) खारेज गरेका छन्।
सुरक्षा स्वीकृति खारेज भएपछि उनीहरूको गोप्य सूचनामा पहुँच हुनेछैन भने संवेदनशील सरकारी निकायहरूमा एक्लै जान पनि पाउने छैनन्।
राजनीतिक विरोधीहरू माथि प्रतिशोधको अभियान विस्तार गर्दै ट्रम्पले शुक्रबार पूर्व उपराष्ट्रपति ह्यारिस, र पूर्व प्रथम महिला तथा विदेश मन्त्री क्लिन्टनलाई संवेदनशील सरकारी सूचनामा पहुँचबाट वञ्चित व्यक्तिहरूको सूचीमा समावेश गरिने घोषणा गरेका हुन्।
ट्रम्पले सन् २०१६ को राष्ट्रपति चुनावमा क्लिन्टनलाई र २०२४ मा ह्यारिसलाई पराजित गरेका थिए।
ट्रम्पको सूचीमा पहिलो कार्यकालमा उनको सरकारका लागि काम गरेकी रूस विज्ञ फियोना हिल पनि समावेश छिन्। हिलले ट्रम्पको पहिलो कार्यकालमा उनको युक्रेन युद्धप्रतिको दृष्टिकोणको आलोचना गरेकी थिइन्। अहिलेको ट्रम्पले युद्ध रोक्न अपनाएको रूसलाई फाइदा हुने नीतिको पनि आलोचना गर्छिन्।
ट्रम्पले पहिले नै अघिल्ला राष्ट्रपति जो बाइडेनलाई सुरक्षा स्वीकृतिबाट बञ्चित गर्नुपर्ने व्यक्तिहरूको सूचीमा समावेश गरिसकेका थिए। बाइडेनका शीर्ष सहयोगीहरू पूर्वराष्ट्रिय सुरक्षा सल्लाहकार जेक सुलिवान, र पूर्व विदेशमन्त्री एन्टोनी ब्लिन्केनलाई सो सूचीमा राखेका थिए।
ट्रम्पले सन् २०२० को चुनाव आफूले नहारेको र बाइडेनले धाँधली गरेर जितेको दाबी गरेर आफ्ना समर्थकलाई विद्रोह गर्न उक्साएका थिए। त्यसपछि बाइडेनले पनि कार्यभार सम्हालेपछि ट्रम्पको सुरक्षा स्वीकृति खारेज गरेका थिए। त्यसैको बदला स्वरूप ट्रम्पले बाइडेन र उनका सहयोगीहरूको सुरक्षा स्वीकृति खारेज गरेको मानिन्छ।
तर ट्रम्पको पछिल्लो कदमले उनी दोस्रो कार्यकालको सुरूमा राजनीतिक शत्रुहरूलाई कुन हदसम्म निशाना बनाइरहेका छन् भन्ने कुरा उजागर गर्छ भनेर फाइनान्सियल टाइम्सले लेखेको छ।
उनको निशानामा प्रतिपक्षी डेमोक्र्याट मात्रै नभएर उनी फेरि राष्ट्रपति बन्नु हुँदैन भन्ने पूर्व वायोमिङबाट निर्वाचित प्रतिनिधि सभा सदस्य लिज चेनी लगायत रिपब्लिकन नेताहरू पनि परेका छन्। चेनीको पनि उनले सुरक्षा स्वीकृति खारेज गरेका छन्।
ट्रम्पविरूद्ध मुद्दा चलाउने म्यानहट्टन जिल्ला वकिल अल्भिन ब्राग र न्यूयोर्क राज्यकी महान्यायाधिवक्ता लेटिसिया जेम्सलाई पनि निशाना बनाएका छन्।
ट्रम्पको पछिल्लो कदम उनले न्यायपालिकामाथि प्रहार गरिरहेको बेला आएको छ।
ट्रम्पले भेनेजुएलाको आपराधिक समूह सदस्य भनेर देश निकाला गरिएका सयौं आप्रवासीको मुद्दा हेरिरहेका संघीय न्यायाधीशलाई महाभियोग लगाउने भनेपछि प्रधानन्यायाधीश जोन रोबर्ट्सले गत हप्ता त्यसको निन्दा गरेका थिए।
भेनेजुएलाको आपराधिक समूह ‘ट्रेन दि अरागुआ’ का सदस्यहरू भन्दै २५० भन्दा बढी आप्रवासीलाई ट्रम्पले देश निकाला गरेका थिए।
अमेरिकाको संघीय अदालत अन्तर्गतको वासिङ्गटन डिसीमा रहेको जिल्ला अदालतका प्रमुख न्यायाधीश जेम्स बोजबर्गले १४ दिनका लागि उनीहरूलाई देश निकाला नगर्नु भन्ने अस्थायी आदेश गरे पनि ट्रम्प सरकारले उनीहरूलाई निकालेको थियो।
ट्रम्प सरकारले अदालतको आदेश नमानेको भन्दै न्यायाधीश जेम्स बोजबर्गले त्यसबारे जबाफ मागेका छन्।
बोजबर्गलाई रिपब्लिकन पार्टीबाट निर्वाचित तत्कालीन राष्ट्रपति जर्ज डब्ल्यु बुसले २००२ मा डिसी सुपरियर कोर्टमा न्यायाधीश नियुक्त गरेका थिए। उनलाई सन् २०११ मा डेमोक्र्याटिक पार्टीबाट निर्वाचित तत्कालीन राष्ट्रपति बाराक ओबामाले वासिङ्गटन डिसीमा रहेको जिल्ला अदालतमा बढुवा गरेका थिए।
ट्रम्पले सामाजिक सञ्जालमा पोस्ट गर्दै बोजबर्गलाई महाभियोग लगाउने पर्ने भनेका थिए। बोजबर्गलाई नियतवश निहुँ खोज्ने र कट्टर वामपन्थी बौलाहा भन्दै उनलाई ‘बाराक हुसेन ओबामा’ले नियुक्त गरेको भने। ट्रम्प राजनीतिमा आउनुअघि नै तत्कालीन राष्ट्रपति ओबामा अमेरिकामा नजन्मेको गलत दाबी गर्दै उनी राष्ट्रपति हुन नपाउने भन्थे। त्यस्तै, ओबामा हवाई राज्यमा जन्मेका इसाइ भए पनि उनको पूरा नाम ‘बाराक हुसेन ओबामा’ औंल्याउँदै उनी मुसलमान भएको झूटो दाबी गर्थे।
'मतदाताहरूले मैले जे गरूँ भनेर चाहेका थिए, मैले त्यही गरिरहेको छु। मलाई अदालतमा हाजिर गराउने धेरै बेइमान न्यायाधीशहरू जस्तै यी न्यायाधीशलाई महाभियोग लगाइनुपर्छ,' ट्रम्पले बोजबर्ग विरूद्धको पोस्टमा लेखेका थिए।
त्यसमा प्रतिक्रिया जनाउँदै प्रधानन्यायाधीश जोन रोबर्ट्सले मंगलबार विज्ञप्ति निकालेर महाभियोग लगाउने मागको निन्दा गरेका थिए। अदालतहरूलाई परम्परागत मुद्दा प्रणालीमार्फत् कानुनी विवादहरू समाधान गर्न छोडिनुपर्छ भनेर रोबर्ट्सले भनेका थिए।
'दुई शताब्दीभन्दा बढी समयदेखि यो स्थापित भएको छ कि न्यायिक निर्णयको सम्बन्धमा असहमतिका लागि महाभियोग उपयुक्त प्रतिक्रिया होइन। त्यस प्रयोजनका लागि पुनरावेदन समीक्षाको सामान्य प्रक्रिया छ,' रोबर्ट्सले सो वक्तव्यमा भने।
ट्रम्पले पहिलो कार्यकालमा सन् २०१८ मा आप्रवासनसम्बन्धी अर्को मुद्दामा फैसला गर्ने न्यायाधीशलाई 'ओबामा न्यायाधीश' भनेर आक्रमण गरेपछि पनि प्रधानन्यायाधीश रोबर्ट्सले अदालतको बचाउमा विज्ञप्ति निकालेका थिए।
'हामीसँग ओबामा न्यायाधीश वा ट्रम्प न्यायाधीश, बुश न्यायाधीश वा क्लिन्टन न्यायाधीश छैनन्। हामीसँग समर्पित न्यायाधीशहरूको असाधारण समूह छ, जो आफू समक्ष आएकाहरूलाई समान न्याय दिन आफूले सकेसम्म प्रयास गरिरहेका हुन्छन्,' रोबर्ट्सले त्यतिबेला भनेका थिए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1742801159.jpg)
