अमेरिकी राष्ट्रपति डोनाल्ड ट्रम्प निकट धनाढ्य इलन मस्कलाई चीनसँग हुने सम्भावित युद्धबारे अमेरिकी योजनाको ब्रिफिङ दिइने समाचारले अमेरिकामा खैलाबैला मच्चिएको छ।
ट्रम्पले सरकारी सेवाको प्रभावकारिताको लागि बनाएको डिपार्टमेन्ट अफ गभर्न्मेन्ट इफिसिएन्सीका (डोज) प्रमुख मस्क शुक्रबार रक्षा मन्त्रालय भ्रमण गर्ने कार्यक्रम छ।
सो भ्रमणमा उनलाई चीनसँग युद्ध भए अमेरिकाको सैन्य योजना के हुन्छ भनेर ब्रिफिङ गरिने भनेर दुई सरकारी अधिकारीको हवाला दिँदै द न्यूयोर्क टाइम्सले बिहीबार समाचार लेखेको थियो।
अर्का अधिकारी सो ब्रिफिङ चीन केन्द्रित हुने भने पनि अरू कुरा नखुलाएको र चौथो अधिकारीले मस्कले पेन्टागनको भ्रमण गर्ने पुष्टि गरे पनि त्यस बाहेक अरू केही नभनेको टाइम्सले जनाएको छ।
ट्रम्पको रिपब्लिकन पार्टी निकट मानिने द वाल स्ट्रिट जर्नलले पनि टेस्ला कम्पनीका मालिक मस्कको शुक्रबारको भ्रमणमा उनलाई चीनसँग हुने सम्भावित युद्धबारे गोप्य सैन्य योजनाको ब्रिफिङ दिइने भनेर समाचार लेखेको छ।
टेस्लाको सबभन्दा ठूलो कारखाना चीनमा रहेको र मस्कका अरू धेरै व्यापार पनि चीनमा निर्भर रहेकाले उनलाई चीनसँग हुने सम्भावित युद्धबारे ब्रिफिङ दिँदा स्वार्थको द्वन्द्व हुने भनेर सर्वत्र विरोध भएको छ।
चुनाव नजितेको र संसदीय सुनुवाइ समेत सामना नगरेका अनि चीनसँग व्यापारिक स्वार्थ जोडिएका मस्कलाई चीनसँग हुने सम्भावित युद्धबारे ब्रिफिङ दिने समाचारले ट्रम्प सरकारलाई अप्ठयारोमा पारेको छ।
ट्रम्प, मस्क र रक्षा मन्त्रालय सबैले मस्कले शुक्रबार पेन्टागनको भ्रमण गर्ने कार्यक्रम रहे पनि उनलाई चीनसँग हुने सम्भावित युद्धबारे ब्रिफिङ नदिइने दाबी गरेका छन्। उनीहरूले त्यसबारे आएका सबै समाचार झूटो र आधारहीन भनेका छन्।
सामाजिक सञ्जालमा लेख्दै ट्रम्पले त मस्कको भ्रमणमा चीनबारे उल्लेख समेत नगरिने बताएका छन्। ट्रम्पको पोस्टलाई आफ्नो सामाजिक सञ्जाल एक्समा रिपोस्ट गर्दै मस्कले टाइम्सलाई ‘विशुद्ध दुष्प्रचार’ भनेका छन्।
त्यस्तै, पेन्टागन भ्रमणमा उनलाई चीनसँग हुने सम्भावित युद्धबारे अमेरिकी योजनाको ब्रिफिङ दिइने भनेर समाचार चुहाउने कर्मचारीलाई मस्कले खुल्लमखुल्ला धम्की दिएका छन्।
त्यो समाचार चुहाउने अधिकारी खोजिने र टाइम्सलाई नियतवश गलत सूचना चुहाएकोमा उनीहरूविरूद्ध चल्ने मुद्दाको प्रतीक्षा गरिरहेको भनेर मस्कले एक्समा लेखेका छन्।
यी समाचारपछि पनि मस्कको शुक्रबार हुने पेन्टागन भ्रमण रद्द भएको छैन। यी समाचारपछि उनलाई भ्रमणका क्रममा चीनसँग हुने सम्भावित युद्धबारे ब्रिफिङ गरिन्छ कि गरिँदैन भन्ने पनि खुलेको छैन।
मस्कले ट्रम्पलाई चुनाव जिताउन २५ करोड डलरभन्दा बढी खर्च गरेका थिए। उनले एक्सलाई पनि ट्रम्पको समर्थनमा परिचालन गरेका थिए।
मस्कको गुन तिर्न ट्रम्पले उनलाई डोज (डिपार्टमेन्ट अफ गभर्न्मेन्ट इफिसिएन्सी) प्रमुखमा नियुक्त गरेका छन्। ट्रम्पको मन्त्री चयनदेखि लिएर विदेशी सरकार प्रमुखहरूसँगको छलफलमा पनि मस्क सहभागी भएका थिए।
चुनावअघि नै ट्रम्पले सरकारी सेवा चुस्त बनाउन मस्कको नेतृत्वमा एउटा निकाय बनाउने घोषणा गरेका थिए।
चुनाव जितेपछि नोभेम्बरमै सो विभागको घोषणा गर्दा मस्क त्यसको प्रमुख भनेर खुलाएका थिए। सो विभागले युएसएआइडी लगायत धेरै अमेरिकी सरकारी कार्यालयमा आतंक मच्चाएको छ। त्यस्तै हजारौं सरकारी कर्मचारीलाई निष्कासन गरेको छ भने अर्बौं डलरको सरकारी बजेट रोकेको छ।
त्यसैले अहिले डोज र मस्कविरूद्ध धेरै मुद्दा परेका छन्। यसरी ट्रम्पलाई समर्थन गर्दै, उनको शासनमा संलग्न हुँदै अमेरिका र युरोपको राजनीतिमा समेत हस्तक्षेप गर्न थालेपछि मस्कलाई आर्थिक नोक्सानी समेत हुन थालेको छ।
टेस्लाको सबभन्दा ठूलो कारखाना चीनमा भएको र चीनसँग सम्बन्ध बिग्रिए मस्कको अरू व्यापारमा पनि नोक्सान हुने भएकाले उनी चीनविरूद्ध नरम भएको मानिन्छ। आफ्ना व्यक्तिगत स्वार्थले पनि उनले ट्रम्पलाई चीनविरूद्ध बढी आक्रामक हुनबाट रोक्छन् भन्ने चीनले आशा गरेको भनिन्छ।
यस्तोमा उनलाई चीनसँग हुने सम्भावित युद्धबारे अमेरिकी योजनाको ब्रिफिङ दिइने समाचार आएपछि व्यापक विरोध भएको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
