लुम्बिनी प्रदेशमा यसवर्ष करिब ९५ हजार विद्यार्थीले एसइई दिँदै छन्।
गतवर्ष भन्दा यसवर्ष एसइईमा सहभागी हुने परिक्षार्थीको संख्या बढेको हो। गतवर्ष ८३ हजार ४ सय विद्यार्थी सहभागी भएको एसइईमा यसवर्ष ९४ हजार ९०८ जना परिक्षार्थी सहभागी हुँदै छन्। यो संख्या गतवर्ष भन्दा साढे ११ हजार बढी हो।
आज बिहीबार बिहान ८ बजेदेखि सुरू हुने एसइईमा लुम्बिनी प्रदेशबाट प्राविधिक धारतर्फ ३ हजार १७४ र ग्रेडवृद्धितर्फ २० हजार ३१० जना परिक्षार्थी सहभागी हुँदै छन्।
चैत्र १९ गतेसम्म चल्ने परीक्षामा सबैभन्दा बढी रूपन्देहीमा २२ हजार ६२३ जना परिक्षार्थी सहभागी हुंँदै छन्। गतवर्ष रूपन्देहीबाट १९ हजार ६४८ जना विद्यार्थीले एसइई परीक्षा दिएका थिए। रूपन्देहीबाट मात्र यसवर्ष करिब तीन हजार विद्यार्थी थपिएका छन्।
शिक्षा तथा सामाजिक विकास निर्देशनालयका उपसचिव नारायणप्रसाद पोखरेलका अनुसार गतवर्ष भन्दा यसवर्ष कपिलवस्तुमा भने ५ सय ९७ विद्यार्थी घटेका छन्। २०८० को एसइई परीक्षामा ९ हजार ५८ विद्यार्थी सहभागी भएकोमा २०८१ को परीक्षामा भने ८ हजार ४ सय ६१ विद्यार्थी सहभागी हुँदै छन्।
पोखरेलका अनुसार पाल्पामा यसवर्ष ७ सय २९ विद्यार्थी थपिएका छन्। गतवर्ष ४ हजार १ सय ८१ विद्यार्थी सहभागि भएकोमा यसवर्ष ४ हजार ९ सय १० विद्यार्थी सहभागी हुँदै छन्।
त्यस्तै गुल्मीमा ४ हजार ८ सय ५७, अर्घाखाँचीमा ३ हजार ४ सय ६५, प्युठानमा ४ हजार ९ सय ४०, रोल्पामा ४ हजार ७ सय ६५ र बर्दियामा ७ हजार ७ सय ६२ परिक्षार्थी सहभागी हुँदै छन्। त्यसैगरि बाँकेमा १० हजार २ सय ७४, दाङमा १४ हजार २ सय ५४ र पश्चिम नवलपरासीमा ६ हजार ३ सय ९७ विद्यार्थीले एसइई परीक्षा दिँदै छन्।
यसवर्ष विद्यार्थी संख्या थपिएपछि परीक्षा केन्द्र पनि थपिएको छ। गतवर्ष ३४० वटा परिक्षा केन्द्रबाट परीक्षा दिएकोमा यसवर्ष लुम्बिनीका १२ जिल्लामा ३४८ वटा परीक्षा केन्द्र थप गरिएको निर्देशनालयका उपसचिव पोखरेलले जानकारी दिए।
रूपन्देहीमा गतवर्ष ५८ वटा परिक्षा केन्द्र रहेकोमा यसवर्ष ६० वटा परीक्षा केन्द्रबाट परीक्षा सञ्चालन हुँदै छ। विद्यार्थी संख्या थपिए पनि गुल्मीमा दुईवटा परीक्षा केन्द्र घटाइएको छ भने कपिलवस्तुमा विद्यार्थी संख्या कम भए पनि परीक्षा केन्द्र थप गरिएको छ।
गुल्मीमा गतवर्ष २८ वटा केन्द्र रहेकोमा यसवर्ष २६ वटा केन्द्र तोकिएको छ। कपिलवस्तुमा गतवर्ष ३० वटा केन्द्र रहेकोमा यसवर्ष ३४ वटा बनाईएको निर्देशनालयले जनाएको छ।
निर्देशनालयले परीक्षालाई मर्यादित, अनुशासित, भयरहित तथा शान्तिपूर्ण वातावरणमा सञ्चालन गर्न सबै जिल्लाका परीक्षा समन्वय समितिलाई निर्देशन दिएको छ।
उपसचिव पोखरेलका अनुसार परीक्षा सञ्चालन तथा व्यवस्थापनका लागि लुम्बिनीका १२ वटा जिल्लामा ३४८ जना केन्द्राध्यक्षसहित ६३४ सहायक केन्द्राध्यक्ष, ४ हजार ७५८ निरीक्षक, ९५८ सहायक र १ हजार ९०२ कार्यालय सहयोगी गरी ८ हजार ६ सय जनशक्ति परिचालित भएको जानकारी दिए। साथै परीक्षालाई भयरहित र शान्तिपूर्ण बनाउन जिल्ला प्रहरी कार्यालय तथा सशस्त्र प्रहरी बल नेपालबाटआवश्यक सुरक्षा व्यवस्था समेत गरिएको छ।
