अमेरिकी राष्ट्रपति डोनाल्ड ट्रम्पले भेनेजुएलाको आपराधिक समूह ‘ट्रेन दि अरागुआ’ का सदस्यहरू भन्दै सयौं कैदीलाई देश निकाला गरेपछि विवादमा तानिएका छन्।
अमेरिकाको संघीय अदालतले ट्रम्पलाई आपराधिक समूहका सदस्य भनिएकाहरूलाई देश निकाला नगर्न भने पनि राष्ट्रपतिको अधिकार प्रयोग गरेको भनेर निकालेपछि ह्वाइट हाउस र न्यायपालिकाबीच विवाद उत्पन्न भएको हो।
ट्रम्पले सन् १७९८ को विदेशी शत्रु कानुन (एलियन इनिमी एक्ट) लाई ब्युँताएर एल साल्भाडोरको जेलमा पठाएका २३८ जना आपराधिक समूह ‘ट्रेन दि अरागुआ’ का सदस्यहरू हुन् भनेर आरोप लगाएका छन्।
अन्तर्राष्ट्रिय समाचार संस्था रोयटर्सका अनुसार ट्रेन दि अरागुआ समूह विशेषगरी मानव बेचबिखनमा संलग्न छ।
यससँगै यो समूह एक्टटर्सन (रकम असुली), अपहरण, मनी लाउन्डरिङ, सुपारी लिएर मानिस हत्या गर्ने, तस्करी, पानामा देखि ब्राजिलसम्म संगठित रूपमै चोरी गर्ने जस्ता आपराधिक गतिविधिमा संलग्न छ।
यस समूहको नेतृत्व हेक्टर ‘निनो’ गुरेरोले गर्दै आएका छन्। उनी हाल फरार छन्। उनी सन् २०२३ मा भेनेजुएलाको टोकोरोन जेलमा प्रहरीले छापा मार्नुअघि फरार भएका थिए।
यो समूहले चिली जस्ता समृद्ध देश वा अन्य दक्षिण अमेरिकी वा युरोप जाने रूटलाई नियन्त्रण गर्ने गरेको छ। ती रूट विशेषगरी भेनेजुएली र अन्य दक्षिण अमेरिकी नागरिकहरूले प्रयोग गर्छन्।
ट्रेन दि अरागुआको प्रभाव र यसको संख्या अमेरिकामा कति छ भन्ने यकिन छैन। तर ट्रम्प प्रशासनले उक्त समूहसँग सम्बन्ध रहेको भन्दै आप्रवासीलाई पक्राउ गरेको हो र उनीहरूलाई आप्रवासीलाई निकाल्ने सरकारी नीति भन्दै देश निकाला गरी एल साल्भाडोरको जेलमा पठाइएको हो।
ट्रम्पको सेक्रेटरी अफ होमल्यान्ड सेक्युरिटी क्रिस्टी नोइमले उक्त आपराधिक समूहले न्यूयोर्क सिटीमा रहेको एक होटललाई बेस बनाएको बताइन्। उक्त होटलमा अरू आप्रवासीहरू पनि रहँदै आएको उनले दाबी गरेकी थिइन्।
अमेरिकाको स्टेट डिपार्टमेन्टले ट्रेन दि अरागुआ र अन्य लागुऔषध तस्कर समूहलाई ग्लोबल आतंकवादी संगठनको रूपमा तोकेको छ। यसले अमेरिकाको राष्ट्रिय सुरक्षा, परराष्ट्र नीतिमा असर पार्ने उल्लेख गरिएको छ।
वासिङ्टनको इन्टरपोलले पनि यो समूह विश्वको अन्तरदेशीय आपराधिक समूहरूमध्ये खतरनाक समूह रहेको जनाएको छ।
भेनेजुएला सरकारले भने यो समूहलाई २०२३ मा छापा मार्दा नै निस्तेज पारेको र अहिले यसको अस्तित्व नरहेको दाबी गर्दै आएको छ।
यो समूह अरागुवाको तोकोरोन कारागारमा बनेको रोयटर्सले जनाएको छ। जहाँ उनीहरूले सुरक्षागार्डहरूलाई घुस खुवाएर विशेषाधिकार प्राप्त गर्दै आएका थिए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको।)
यो पनि:
ट्रम्पले १८ औं शताब्दीको कानुन ब्युँताएपछि ह्वाइट हाउस र अदालतबीच ‘टसल’
-1742801159.jpg)
