नेपाल प्रहरीको महानिरीक्षक (आइजिपी) मा दीपक थापा नियुक्त भएका छन्।
सोमबार बसेको मन्त्रिपरिषद बैठकले उनलाई आइजिपी नियुक्त गर्ने निर्णय गरेको प्रधानमन्त्रीको सचिवालयले जनाएको छ।
आइजिपीमा दीपक थापा नियुक्त भएको प्रधानमन्त्री केपी शर्मा ओलीका प्रेस संयोजक प्रकाश सिलवालले बताएका छन्।
यसअघिका आइजिपी बसन्तबहादुर कुँवरको कार्यकाल सोमबार सकिएको थियो।
आइजिपी भएका थापा २०५२ भदौ १९ गते प्रहरी निरीक्षकबाट सेवामा प्रवेश गरेका हुन्।
उनी २०६३ भदौ ८ मा डिएसपी, २०७२ साउन ८ मा एसपी, २०७५ फागुन ६ गते एसएसपी र २०७९ असार १७ गते डिआइजी भएका थिए।
उनी २०७९ चैत ६ गते उनी एआइजीमा बढुवा भएका थिए।
उनले कानुनमा एलएलबी, राजनीति शास्त्रमा एमए र जनप्रशासनमा एमपिए गरेका छन्।
सिआइबीमा एआइजी भएर प्रमुख रहेका उनी नेपाल प्रहरी प्रधान कार्यालय प्रबन्ध निर्देशनालय, प्रशासन विभाग र काठमाडौं उपत्यका प्रहरी कार्यालयमा पनि प्रमुख भइसकेका छन्।
त्यस्तै, उनी बागमती प्रदेश प्रहरी कार्यालय प्रमुख, काठमाडौं उपत्यका अपराध कार्यालय प्रमुख समेत भएको अनुभव छ।
उनी बुटवल र राष्ट्रिय प्रहरी प्रशिक्षण प्रतिष्ठान महाराजगञ्जमा बसेर काम गरेका छन्। जिल्ला प्रहरी कार्यालय रूकुम, खोटाङ, सुनसरी, मोरङ, मकवानपुर र चितवन बसेर काम गरिसकेका छन्।
उनी महानगरीय वृत्त महाराजगञ्जमा पनि प्रमुख भइसकेका छन्।
नेपाल प्रहरी स्कुल साँगा, डोटी र रौतहटको प्रमुख, इलाका परहरी कार्यालय बनेपा, बुटवल र गरूडामा पनि बसेर काम गरेको अनुभव थापासँग छ। त्यसबाहेक उनी संयुक्त राज्य संघको सुडान र लाइबेरियाको मिसनमा पनि पुगेका छन्।
-1742214025.jpg)
