रुपन्देहीमा शुक्रबार होलीको दिनमा सवारी नियम उल्लंघन गरि सवारी चलाउने २०१ मोटरसाइकल चालक कारबाहीमा परेका छन्।
बुटवल, भैरहवा, देवदह, मणिग्राम, सालझण्डी, मुर्गिया, लुम्बिनी लगायत जिल्लाका विभिन्न स्थानमा गरिएको चेकजाँचका क्रममा उक्त संख्यामा मोटरसाइकल चालकहरु कारवाहीमा परेको जिल्ला प्रहरी कार्यालय रुपन्देहीले जनाएको छ।
जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक सुरज कार्कीले होली मनाउने नाममा मादक पदार्थ सेवन गरी मोटरसाइकल चलाउने, सवारी चालक अनुमतिबिना मोटरसाइकल चलाउने, हेलमेट नलगाउने र दुईजना भन्दा बढी मोटरसाइकलमा चढेर सवार गर्ने २०१ जना मोटरसाइकल चालकलाई कारवाही गरिएको जानकारी दिए।
चेकजाँचको क्रममा सवारी चालक अनुमतिपत्र नबोकी हो-हल्ला गर्दै मोटरसाइकल चलाउने कतिपय चालकलाई सवारी चालक अनुमतिपत्र ल्याएपछि सम्झाइबुझाइ छोडिएको उनले जानकारी दिए।
कारवाहीमा परेका २०१ जनालाई भने जरिवाना असुल गरि साँझ ६ बजेपछि मात्र छोडिएको कार्कीले जानकारी दिए।
यस्तै होलीको बहानामा मादक पदार्थ सेवन गरी होहल्ला गर्दै हिंड्ने २५ जनालाई जिल्लाका विभिन्न स्थानबाट पक्राउ गरी शुक्रबार साँझ छोडिएको प्रहरी नायब उपरीक्षक कार्कीले जानकारी दिए।
यस्तै रुपन्देहीमा मोटरसाइकल दुर्घटनामा परी एक जनाको ज्यान गएको छ।
शनिबार विहान ७ बजेतिर देवदह नगरपालिका वडा १० चरंगे लडियापार्कस्थित भित्री सडकखण्डको पक्की पुलबाट खसेर स्थानीय २७ वर्षीय सागरजंग शाहीको मृत्यु भएको हो।
प्रहरी नायब उपरीक्षक कार्कीका अनुसार लु ६ प ८७२० नं. को मोटरसाइकलमा सवार शाहीको पक्की पुलबाट खोलामा खस्दा मृत्यु भएको हो।
-ink-1741839680.jpeg)
