दाङको घोराही उपमहानगरपालिका–१४ स्थित शुभ प्रभात माध्यमिक विद्यालयका प्रधानाध्यापक रुद्र बुढामाथि भएको आक्रमणको दाङमा क्रियाशील विभिन्न शिक्षक संघ संगठनले विरोध गरेका छन्।
बिहीबार संयुक्त विज्ञप्ति जारी गर्दै नेपाल शिक्षक महासंघ, जिल्ला कार्यसमिति दाङ लगायत विभिन्न आठ वटा शिक्षक संगठनहरूले विद्यालय व्यवस्थापन समितिको गठन प्रक्रियाको बहानामा प्रअ बुढामाथि भएको सांघातिक आक्रमणको विरोध गर्दै दोषीमाथि कारबाहीको माग गरेका छन्।
विद्यालय जस्तो शान्ति क्षेत्रमा प्रवेश गरी स्थानीय सरकारका प्रतिनिधिबाट भएको कुटपिटको घटनाको विरोध गर्दै दोषीमाथि कारबाहीको माग गरिएको छ।
वडाध्यक्ष भानसिङ बुढाको समूहले प्रअमाथि निर्घात कुटपिट गरेको आरोप पीडितको छ।
शिक्षक संगठनहरूले विद्यार्थीले शान्तिपूर्ण रूपमा पढ्न पाउने तथा शिक्षक र कर्मचारीले निर्भयतापूर्वक काम गर्न पाउने वातावरणमा निर्माणका लागि सबै पक्षलाई आग्रह गरिएको छ।
नेपाल शिक्षक महासंघ, दाङका अध्यक्ष युवराज बस्नेत, नेपाल शिक्षक संघ, दाङका अध्यक्ष प्रकाश डाँगी, एकीकृत अखिल नेपाल शिक्षक संगठन, दाङ अध्यक्ष झक्कुप्रसाद केसी, अखिल नेपाल शिक्षक संगठन, दाङका अध्यक्ष धनिराम घर्ती मगर, अखिल नेपाल शिक्षक संघका रुमालप्रसाद बसेल, प्रगतिशिल नेपाल राष्ट्रिय शिक्षक संगठन, दाङका अध्यक्ष शुशिला पौडेल, नेपाल शिक्षक फोरम, दाङ जयराम यादव, विद्यालय कर्मचारी परिषद्, दाङका अध्यक्ष तप्तप्रसाद शर्माले संयुक्त विज्ञप्तिमार्फत् भविष्यमा यस्ता घटना दोहोरिन नदिन सम्बन्धित निकायलाई सचेत तुल्याएका छन्।
यो पनि:
वडाध्यक्षले कुटे प्रधानाध्यापक
