केही दिन भयो काठमाडौंको मौसम खुल्न सकेको छैन।
न घाम लाग्ने, न बादल नै फाट्ने अचम्मसँग धुम्मिएको छ, काठमाडौं उपत्यकासहित देशको धेरै भागको मौसम।
पर्यावरणले वसन्त डाकिसक्दा पनि मौसमले खुलेर स्वागत गर्न नसकेको बेला फागुको रौनक छाएको छ।
फाल्गुण शुक्ल पूर्णिमाको दिन काठमाडौं उपत्यकासहित देशका पहाडी र हिमाली क्षेत्रमा यो पर्वको विशेष रौनक छाउने गर्छ।
तराईं क्षेत्रमा भने फागु पूर्णिमाको भोलिपल्ट अर्थात् शुक्रबार होली पर्व मनाइन्छ। त्रेता युगदेखि नै नेपाली, परम्परा र रीतिरिवाजको अविच्छिन्न हिस्सा बनेको मानिएको होली विशेष गरेर रङ र पानीको सांस्कृतिक संगम हो।
आपसमा रङ दलेर र पानी छ्यापेर मनाइने यो पर्व भावना तथा सद्भाव सेतु पनि हो।
प्रत्येक वर्ष वसन्तपुरमा विधिपूर्वक चीर ठड्याइएसँगै यो पर्वको उल्लास सुरू हुन्छ।
हनुमानढोका दरबारको गद्दी बैठकको दक्षिणतर्फ तीन तले चीर ठड्याएपछि देशभर फागुको उमंग छाउँछ।
वसन्तपुरमा ठड्याइने चीरको पनि छुट्टै सांस्कृतिक वैशिष्ट्य छ।
भक्तपुरको बाँसघारीबाट ल्याइएको बाँस तथा गुह्येश्वरीबाट ल्याइएको मयल रूखको हाँगालाई होली सुरू हुने एक साताअघि नै विशेष पूजाअर्चना गरी ठड्याइने गरिन्छ।
रंगीचंगी ध्वजापताका टाँगेर मयलको रूखको हाँगा बाँधिएको अग्लो बाँसको चीर गाडिन्छ। त्यसपछि चीरलाई परिक्रमा गर्दै एक आपसमा अबिर लगायत रङ छ्यापी होलीको हर्ष सुरू हुन्छ।
होलीको दिन काठमाडौंको वसन्तपुर, पाटन दरबार क्षेत्रमा रङ्गोत्सव छाएको छ। फागुका रङहरूमा युवायुवती खुलेका छन्। समूह, समूहमा भेला भएका उनीहरू अहिले वसन्तपुरमा आपसमा रङ दलेर सद्भावको सञ्चार गरिरहेका छन्।
सयौंको संख्यामा वसन्तपुरमा पुगेका युवायुवतीको भिडले वसन्तपुरको दृश्य हेर्न लायक बनेको छ। तर यो वर्ष मात्रै वसन्तपुरमा रङ्गोत्सव छाएको भने होइन। विगत धेरै वर्षदेखि वसन्तपुरमा होली मेला लाग्दै आएको छ।
चीर गाडिने स्थान भएकाले पनि वसन्तपुर होलीको अविच्छिन्न हिस्सा बनेको हो।
वसन्तपुरबाहेक काठमाडौं उपत्यकामा भक्तपुर, ललितपुर सहरका केही स्थानमा पनि होली मेला लागेको छ। तर वसन्तपुरको जस्तो सघन उपस्थिति भने छैन।
काठमाडौं उपत्यकाका सडक भने खाली र सुनसान छन्। युवायुवतीको समूहले आपसमा रङ दलेर र पानी छ्यापेर रङ्गोत्सवमा सहभागी भए पनि ठूलो उल्लास भने छैन। प्रशासनको बिहानैदेखिको कडाइ र निगरानीले केही असर पारेको छ।
काठमाडौं उपत्यकाका प्रमुख चोक, भित्री गल्लीहरूमा प्रहरीले चेकपोस्ट खडा गरेर अवाञ्छित गतिविधिलाई निगरानी गरिराखेको छ। मादपक पदार्थ र लागु पदार्थ सेवन गर्नेहरूलाई नियन्त्रणमा लिइराखेको छ।
तस्बिरहरू:
-1741857979.jpg)
-1741857979.jpg)
-1741857980.jpg)
-1741857979.jpg)
-1741857981.jpg)
-1741857983.jpg)
-1741857981.jpg)
