काठमाडौंका ७५ ठाउँमा चेकप्वाइन्ट, बिहानैदेखि मापसे र लापसे जाँच (तस्बिरहरू)

जनपद र ट्राफिक गरी २ हजार ७०६ जना प्रहरी परिचालन

नवीनबाबु गुरूङ

काठमाडौं, फागुन २९

होली पर्वको अवसरमा काठमाडौंमा बिहानैदेखि ठाउँठाउँमा प्रहरीले चेकजाँच गरिरहेको छ।

काठमाडौं उपत्यका ट्राफिक प्रहरी कार्यालयका एसपी सञ्जयबहादुर राउतका अनुसार उपत्यकाका ७५ ठाउँमा चेकपोस्ट खडा गरी चेकिङ भइरहेको छ।

मादक पदार्थ सेवन (मापसे) र लागु पदार्थ सेवन (लापसे) गरी चलाएका सवारी साधन होल्ड र चालकलाई प्रहरीसँग समन्वय गरी नियन्त्रणमा लिइने एसपी राउतले बताए।

होलीमा ट्राफिक नियम उल्लंघन गरी सवारी साधन चलाउने, जिकज्याक चलाउने, तीव्र गतिमा चलाउने, हेलमेट नलगाइ चलाउने र तीन जना बोक्ने मोटरसाइकल र स्कुटरहरूलाई पनि होल्ड गरिने उनले बताए।

काठमाडौंमा बिहान सात बजेदेखि विभिन्न चेकप्वाइन्टमा ट्राफिक प्रहरी खटिएको उनले बताए। लापसे चेकजाँचका लागि लागु औषध नियन्त्रण ब्युरोका प्रहरीसहितको टोली खटिएको उनले बताए।

'चेकजाँचका क्रममा लागु औषध सेवन गरेको शंका भएको अवस्थामा त्यस्तो स्थानमा ब्युरोका प्रहरीसहितको टोली पुग्छौं र लापसे जाँच गर्छौं,' उनले भने।

उनका अनुसार बिहानसम्म २०३ सवारी साधनहरू कारबाहीमा परिसकेका छन्। तीमध्ये ४८ वटा दुइपांग्रे सवारी साधन होल्ड गरिएको छ भने १८ वटा दुइपांग्रे सवारी साधन होल्ड गरिएका छन्।

काठमाडौं प्रहरी परिसरका एसपी अपिलराज बोहराका अनुसार काठमाडौंमा मात्रै ६१ ठाउँमा डेडिकेटेड चेकप्वइन्ट खडा गरिएको छ। ९६ पिकेट, ४४ मोबाइल टोली, ६० क्युआरटी, ४६ वटा सिआरभी भ्यान, ३३ ठाउँमा माइकिङ र सचेतनाको व्यवस्था गरिएको छ।