आइतबार काठमाडौं उपत्यकासहित देशैभर बदलीको अवस्था छ।
पछिल्लो एक घन्टामा उल्लेखनीय वर्षा भएको छैन। तर अधिकांश भूभागमा आंशिकदेखि पूर्णतया बदलीको अवस्था रहेको मौसमविद् हरिप्रसाद दाहालले जानकारी दिए।
उनका अनुसार अहिले भारतको आसाम आसपास एउटा न्यूनचापीय प्रणाली बनेको छ। त्यसको असर नेपालमा पनि परेको छ। देशका पहाडी भूभागमा छिटपुट वर्षा भएको मौसमविद् दाहालले बताए।
यो प्रणालीले उल्लेखनीय वर्षा गराउने सम्भावना नरहेको उनको भनाइ छ।
‘अहिले भारतको आसाम आसपास एउटा लो प्रेसर सिस्टम (न्यूनचापीय प्रणाली) बनेको छ। त्यसले असर यहाँसम्म देखिएको छ। पहाडी भूभागमा बदली र कतै छिटपुट वर्षा भएको छ,’ उनले भने।
उनका अनुसार दुई–तीन दिन मौसममा सुधारको सम्भावना छैन। सोमबारबाट पश्चिमी न्यूनचापीय प्रणालीको सम्भावना देखिने उनले बताए।
‘पश्चिमी न्यूनचापीय प्रणालीले पनि ठूलो वर्षा गराउने अवस्था देखिँदैन,’ उनले भने।
पछिल्लो २४ घन्टामा दाङमा ११ मिलिमिटर वर्षा भएको छ।
इलामका बरफल्याङमा ४.२, झापाको सिस्नेमा ४.८, झापाकै शनिश्चरेमा ५.२ मिलमिटर वर्षा भएको मौसम विभागले जानकारी दिएको छ। त्यस्तै सिन्धुपाल्चोकको बोल्देमा १.८, दुवाचौरमा १.६ मिलिमिटर वर्षा भएको छ।
विभागका अनुसार आइतबार बिहान ८ः४५ बजेसम्म देशका १२ वटा केन्द्रमा वर्षा मापन भएको छ। शनिबार बिहानदेखि आइतबार बिहानसम्म सबैभन्दा बढी मोरङको केराबारी केन्द्रमा १४.४ मिलिमिटर वर्षा मापन भएको छ।
अहिले प्रि–मनसुन चलिरहेको छ। फागुन १७ देखि १७ जेठसम्मको अवधिलाई प्रि–मनसुन भनिन्छ।
प्रि–मनसुनको प्रारम्भमा उल्लेख्य वर्षा भएको छ। फागुन २५ गतेसम्म ९.४० मिलिमिटर वर्षा भएको छ। यो भनेको औसत वर्षाको ४.१ प्रतिशत वर्षा हो।
