बर्दियाको ठाकुरबाबा नगरपालिका – १ की ५१ वर्षीया राधा बोहराको हत्या भएको घटनामा उनकै भिनाजु र भिनाजुकी बुहारी पक्राउ परेका छन्।
फागुन ४ गते भरभित्रै धुरीखाँबोमा बाँधिएको अवस्थामा मृत भेटिएकी राधाको हत्या आरोपमा उनकै भिनाजु ६९ वर्षीय शान्तबहादुर खत्री र खत्रीकी बुहारी २४ वर्षीया उमाकुमारी खत्री पक्राउ परेका हुन्।
फागुन १५ गते जिल्ला अदालतबाट पक्राउ पुर्जी लिएर सोही दिन दुई जनालाई पक्राउ गरी अनुसन्धान अगाडि बढाइएको जिल्ला प्रहरी कार्यालय बर्दियाका प्रमुख एसपी केदार खनालले जानकारी दिए।
घरभित्र मृत भेटिएकी राधाको घाँटी कसेर हत्या भएको प्रारम्भिक अनुसन्धानबाट खुलेको थियो। उक्त घटनामा राधाकै घरनजिक आफन्तीलाई पक्राउ गरी अनुसन्धान भइरहेको एसपी खनालले बताए।
उनीहरूले हत्यामा आफ्नो संलग्नता स्वीकार भने गरेका छैनन्। तर प्रहरीले अनुसन्धानका क्रममा हत्याको 'मोटिभ' भने पाएको छ।
राधा र उनका दिदी-भिनाजुको घर नजिकै छ। उनी एकल आमा हुन्। उनकी एकमात्रै छोरी अमेरिकामा छिन्।
एक्लो भएका कारण राधा दु:ख सुखमा सहायता हुन्छ भनेर दिदी-भेनाजु नजिक एउटा कटेरो भाडामा लिएर बसेकी थिइन्। उनी गुजाराका लागि रक्सी पारेर बेच्थिन्।
तर लेनदेनका कारण भेनाजुसँग उनको सम्बन्ध दुई/तीन वर्ष यतादेखि बिग्रिएको प्रहरीको अनुसन्धानबाट खुलेको छ।
एसपी खनालका अनुसार दुई/तीन वर्ष अगाडि राधाले भेनाजु शान्तबहादुरलाई ९० हजार रूपैयाँजति ऋण दिएकी रहिछन्। त्यो पैसा पटकपटक फिर्ता माग्दा आफूसँग पैसा नभएको बरू त्यसको सट्टा जग्गा दिने भनेर शान्तबहादुरले आश्वासन दिएका थिए।
तर शान्तबहादुरले पैसाको सट्टामा दिन लागेको जग्गा विद्युतको हाइटेन्सन लाइनमुनिको जग्गा देखाएपछि राधाले त्यस्तो जग्गा नलिने बरू पैसा नै फिर्ता गर्न भनेकी थिइन्।
शान्तबहादुर अत्यन्तै रिसाहा स्वभावको रहेको पनि गाउँलेहरूबाट थाहा भएको एसपी खनाल बताउँछन्।
आफूले दिन लागेको जग्गा नलिएपछि साली-भेनाबीच थप विवाद भएको थियो। त्यही घटनाबाट रिसिइबी साँधेक शान्तबहादुरले बुहारी उमासँग मिलेर राधाको हत्या गर्ने योजना बनाएको खनालले बताए।
घटनामा राधाकी दिदीको भने संलग्नता नदेखिएको एसपी खनालले बताए।
राधा मृत भेटिएको घटनापछि प्रहरी पुग्दा शान्तबहादुर बाख्रा चराउन गएका थिए। अनुसन्धानका लागि प्रहरीले लगेको तालिमप्राप्त कुकुर पनि पटकपटक शान्तबहादुर बाख्रा चराइरहेको ठाउँसम्म पुगेर अलमलिने गरेको एसपी खनालले बताए।
‘कुकुर दुई पटक शान्तबहादुर कहाँ पच्छ्याउँदै पुगेको हो,’ एसपी खनालले भने ‘ शान्तबहादुरले बाख्रा चराउन लगेको हुँदा बाख्राकै गन्धले कुकुर केही अलमलिएको थियो,' उनले भने।
अनुसन्धानकै क्रममा घटना भएको राति २/३ बजेको बीचमा शान्तबहादुर र उनको बुहारी उमाकुमारीको फोन लामो समय व्यस्त रहेको देखिएको छ।
घटनामा उनीहरूको संलग्नता पुष्टि हुने प्रशस्त आधारहरू भेटिएको एसपी खनालले बताए।
