रूपन्देहीको भैरहवा बहुमुखी क्याम्पसमा विद्यार्थीहरूले तोडफोड गरेका छन्।
स्वतन्त्र विद्यार्थी युनियन (स्ववियु) को चुनावलाई लिएर विद्यार्थीहरू तोडफोडमा उत्रिएका हुन्। निर्वाचनको विषयमा विद्यार्थी संगठनहरूबीच बैठक चलिरहेको बेला क्याम्पसको हलमा तोडफोड भएको क्याम्पसले जनाएको छ।
आगामी चैत ५ गते क्याम्पसमा स्ववियु निर्वाचन हुँदैछ। त्यसैका लागि सोमबार देशभरका क्याम्पसहरूमा विद्यार्थी संगठनहरूले नाम दर्ता गरिरहेका छन्। तर, भैरहवा बहुमुखी क्याम्पसमा भने ५ विद्यार्थी संगठनहरूले आइतबार साँझ नै स्ववियु निर्वाचन कार्यकक्षमा तालाबन्दी गरेका थिए।
समाजवादी विद्यार्थी युनियन, समाजवादी विद्यार्थी युनियन नेपाल, जनमत विद्यार्थी संघ, राष्ट्रिय प्रजातान्त्रिक विद्यार्थी युनियन र स्वतन्त्र मधेस विद्यार्थी युनियनले विभिन्न माग राखी क्याम्पसमा रहेको निर्वाचन आयोगको कार्यकक्षमा तालाबन्दी गरेका थिए।
तालाबन्दी भइरहेको अवस्थामा निर्वाचन तालिकाअनुसार निर्वाचन आयोगले आफ्नो प्रक्रिया अगाडि बढाउने भन्दै सोमबार ५ विद्यार्थी संगठनसँग बैठक बसेको थियो।
सोही क्रममा नेकपा एमालेको भातृ संगठन अनेरास्ववियु चुनावका लागि संगठन दर्ता गर्न बाजागाजासहित क्याम्पसमा प्रवेश गरेपछि पाँच विद्यार्थी संगठन तोडफोडमा उत्रिएका हुन्।
विद्यार्थीहरूको तोडफोडले क्याम्पसका कुर्सीहरू भाँचिएका छन्। विद्यार्थीहरूले क्याम्पस प्राङ्गणमा टायर बालेर विरोध प्रदर्शन गरेका थिए।
समाजवादी विद्यार्थी युनियनका इकाई इन्चार्ज इरफान अलीले बैठक कक्षमा अनेरास्ववियुका कार्यकर्ता प्रवेश गरेर होहल्ला गरे पछि पाँच विद्यार्थी संगठनका सदस्यहरू आक्रोशित भएर तोडफोडमा उत्रिएको जानकारी दिए।
घटनाको बारेमा बुझ्न खोज्दा क्याम्पस प्रमुख लक्कीप्रसाद जोशीले फोन उठाएनन्। निर्वाचन तालिकाअनुसार सोमबार स्ववियु निर्वाचन हुने देशभरका क्याम्पसहरूमा संगठन दर्ता गर्ने कार्यतालिका रहेको छ। सोमबार दिउसो ३ बजेसम्म विद्यार्थी संगठनहरूले नाम दर्ता गराउने छन्।
निर्वाचन तालिकाअनुसार फागुन २१ गते बिहान १० बजे मतदाता नामावली प्रकाशित हुने छ भने फागुन २५ गते दिउँसो १ बजेसम्म मतदाता नामावलिमाथि दाबी विरोधको समय तोकिएको छ।
त्यस्तै फागुन २५ गते नै साँझ ५ बजे मतदाताको अन्तिम नामावली प्रकाशित हुने, फागुन २६ गते बिहान ११ बजेदेखि २ बजेसम्म मनोनयन पत्र वितरण र फागुन २७ गते उम्मेदवारी दर्ताको कार्यसूची रहेको छ।
चैत ५ गते बिहान ८ बजेदेखि दिउसो ४ बजेसम्म मतदान कार्यसूची रहेको छ। तर, भैरहवा बहुमुखी क्याम्पसमा भने विद्यार्थी संगठनहरूबीच भएको विवादले निर्वाचन हुने–नहुने अन्योल भएको छ।
