मकवानपुरको इन्द्रसरोवर गाउँपालिका-३ अदुवाबारीमा चोर भनेर आफ्नै छोरालाई मरणासन्न हुनेगरी कुटेको घटना शंकास्पद रहेको खुलेको छ।
बिहीबार ६४ वर्षीय मिनबहादुर ब्लोन र देविमायाले चोर ठानेर आफ्नै छोरा ३९ वर्षीय भरथकुमार भ्लोनलाई मरणासन्न हुनेगरी कुटपिट गरेका थिए।
कुटपिटबाट गम्भीर घाइते भएका भ्लोनकव शुक्रबार उपचार क्रममा भरतपुर अस्पतालमा मृत्यु भएको थियो। टाउकोमा गम्भीर चोट लागेको अवस्थामा प्रहरीले उनलाई बिहीबार राति अदुवाबारीस्थित मीनबहादुरको घरबाट नियन्त्रणमा लिएर उपचारका लागि हेटौँडा अस्पताल पुर्याएको थियो।
त्यहाँबाट थप उपचारका लागि भरतपुर अस्पताल पुर्याएको थियो। शुक्रबार दिउँसो ३ बजे अस्पतालमा मृत्यु भएको हो।
प्रहरीले मीनबहादुर र देवीमायासँग घटनाबारे सोधपुछ गरेको थियो।
जिल्ला प्रहरी कार्यालय मकवानपुरका डिएसपी श्यामु अर्यालका अनुसार उनीहरूले चोर भन्ठानेर भरथमाथि कुटपिट गरेको बताउँदै आएका छन्।
उनीहरूको बयानअनुसार, बिहीबार बेलुका अन्दाजी ८ बजे भरथ अनुहारमा मास्क लगाए घरभित्र छिरेका थिए। घरभित्र छिर्नेबित्तिकै खाना खान लागिरहेका आफ्ना बाबुआमामाथि खुर्सानीको धुलो छ्यापेका थिए।
उनीहरूले आफ्नै छोरा हो भन्ने थाहा नभएको र चोर भन्ठानेर प्रतिवादमा उत्रिएको बताएका थिए। भान्सामा जे-जे भेटिन्छ त्यहीले हानेको त्यसपछि मास्कधारी व्यक्ति पनि बुढाबुढीमाथि जाइलागेको उनीहरूले प्रहरीलाई भनेका छन्। घरभित्रै दुई पक्षबीच घम्साघम्सी भएको उनीहरूले बयानका क्रममा भनेका छन्।
दम्पतीले शंकास्पद 'चोर'लाई नियन्त्रणमा लिएर बाँधे र प्रहरीलाई खबर गरे।
'हामीले चोर समातेर राखेका छौं। चाँडो आइदिनुपर्यो भनेर फोन आयो,' डिएसपी अर्यालले भने।
राति अबेरमा फोन आएपछि असई रामप्रसाद यादवको नेतृत्वमा प्रहरीको टोली खटिएको थियो। प्रहरी चौकी सिस्नेरीबाट घटनास्थल करिब ४/५ किलोमिटरको दूरीमा छ।
प्रहरी पुग्दा चोर भनिएका व्यक्ति रक्ताम्य अवस्थामा थिए। टाउकोबाट पनि रगत बगिरहेको थियो। मिनबहादुरको हात, मुख र टाउकोमा चोट देखिएको थियो। देवीमायाको आँखा र हातमा चोट थियो।
घरबाट प्रहरीले बरामद गरेको झोलामा भरथको पासपोर्ट भेटेपछि मात्रै उनीहरूकै छोरा भएको खुलेको थियो।
मीनबहादुरको करङ भाँचिएको र देवीमायाको हात र आँखामा चोट लागेकाले थप उपचारका लागि उनीहरूलाई शुक्रबार नै काठमाडौं ल्याइएको छ।
प्रहरी अनुसन्धानबाट भरथ दुई वर्षपछि मात्रै घर पुगेको खुलेको छ। तर आफ्नै छोरा पनि नचिनेर भूलवश आक्रमण गरेको भन्ने आमाबाबुको बयान रहस्यमयी रहेकाले प्रहरीले त्यो कोणबाट अनुसन्धान थालेको डिएसपी अर्यालले बताए।
‘रातभरि घम्साघम्सी हुँदा आफ्नै छोरा नचिन्ने भन्ने हुँदैन। हामी त्यो कोणबाट पनि अनुसन्धान गर्दैछौं,’ उनले भने।
अनुसन्धानमै खटिएका एक अधिकारीका अनुसार भरथको उनका आमाबाबुसँग सम्पत्तिको विषयमा विवाद रहेको गाउँलेहरूले सुनाएका छन्।
प्रहरीले त्यसमा पनि अनुसन्धान गरिरहेको छ। त्यसका लागि भरथको परिवारका अन्य सदस्यहरूसँग पनि सोधपुछ गर्ने तयारी गरेको छ।
-1740739055.jpg)
