राजधानी दैनिकले पत्रिकाको मूल्य बढाएको छ। राजधानी न्युज पब्लिकेशन प्रालिले यसअघि १० रुपैयाँमा पत्रिका बिक्री गर्दै आएको थियो। दैनिक ८ पृष्ठ प्रकाशित हुने पत्रिकाको नयाँ मूल्य ५० रुपैयाँ कायम भएको छ।
आर्थिक मन्दी, महँगी तथा विज्ञापन बजार खस्कँदै जानु, पत्रिका छपाइका लागि आवश्यक सामग्रीको मूल्यवृद्धि लगायतका कारणले पत्रिकाको मूल्य बढाउनुपरेको प्रकाशक आशिष शेचरनले प्रकाशकीयमा उल्लेख गरेका छन्।
मूल्य समायोजनले पाठक वर्गलाई केही असुविधा भए पनि निडर भई सत्यतथ्यमा आधारित रहेर अरूभन्दा भिन्दै समाचार प्रेषित गरी पाठकको सुसूचित हुने अधिकारको ग्यारेण्टी गर्ने पत्रिकाले दाबी गरेको छ।
विगतमा प्रकाशकहरूले मूल्यवृद्धि एकमुष्ठ ढंगले गर्ने गरेका थिए। तर यसपटक राजधानीले एक्लै मूल्यवृद्धिको निर्णय लिएको हो।
राजधानी दैनिकमा रहेको सम्पादकीय नेतृत्वमा रहेका एक पत्रकारका अनुसार प्रकाशकले महँगी बढेकै कारण मूल्य बढाउनु परेको बताएका छन्।
‘विज्ञापनको मूल्य बढेको छैन, ५० रुपैयाँ मूल्य राख्दा पनि पत्रिका त्यतिमा छपाइ गर्न सकिने अवस्था छैन भन्ने प्रकाशकको कुरा छ,’ ती पत्रकारले भने, ‘चियाको मूल्य ५/१० रुपैयाँ हुँदा पत्रिकाको मूल्य पनि त्यस्तै थियो। अहिले चियाको मूल्य कति बढेको छ। त्यसैले पत्रिकाको मूल्य समायोजन उचित छ भन्ने हाम्रो प्रकाशकको कुरा छ।'
-1740726361.png)
