मकवानपुरको इन्द्रसरोवर गाउँपालिका-३ अदुवाबारीस्थित एक घरमा मिनबहादुर भ्लोन र उनकी श्रीमती देवीमाया मात्रै बस्छन्।
मिनबहादुर ६४ र देवीमाया ६३ वर्षका भए। उनका छोराहरू काठमाडौं र अन्यत्र बस्छन्। दुई वर्षदेखि उनीहरू पनि अदुवाबारी फर्किएका छैनन्।
बिहीबार बेलुका अन्दाजी ८ बजेको थियो। मिनबहादुर र देवीमाया खाना खाने तयारी गर्दै थिए। त्यति नै बेला एक जना पुरूष घरभित्र छिरे।
३०/३५ वर्षका जस्ता देखिने पुरूषलाई दम्पतीले चिनेनन्। उनले अनुहारमा मास्क लगाएका थिए। अपरिचित व्यक्ति घरभित्र छिरेपछि उनीहरू आत्तिए।
ती व्यक्तिले मिनबहादुर र देवीमायातर्फ अकस्मात् खुर्सानीको धुलो फालेका थिए। खुर्सानी धुलो फालेपछि दम्पतीलाई पनि चोर आएको शंका भयो र उनीहरू पनि प्रतिवादमा उत्रिए।
जिल्ला प्रहरी कार्यालय मकवानपुरका डिएसपी श्यामु अर्यालकाअनुसार दम्पतीले भान्सामा जे-जे भेटिन्छ त्यहीले 'चोर' माथि प्रहार गरे। अन्धाधुन्ध आक्रमण भएपछि मास्कधारी व्यक्ति पनि बुढाबुढीमाथि जाइलागे। दुई पक्षबीच घम्साघम्सी भयो।
अन्ततः दम्पतीले 'चोर'लाई नियन्त्रणमा लिएर बाँधे र प्रहरीलाई खबर गरे।
'हामीले चोर समातेर राखेका छौं। चाँडो आइदिनुपर्यो भनेर फोन आयो,' डिएसपी अर्यालले भने।
राति अबेरमा फोन आएपछि असई रामप्रसाद यादवको नेतृत्वमा प्रहरीको टोली खटियो। प्रहरी चौकी सिस्नेरीबाट घटनास्थल करिब ४/५ किलोमिटरको दूरीमा छ।
प्रहरी पुग्दा चोर भनिएका व्यक्ति रक्ताम्य अवस्थामा थिए। टाउकोबाट पनि रगत बगिरहेको थियो। मिनबहादुरको हात, मुख र टाउकोमा चोट देखिएको थियो। देवीमायाको आँखा र हातमा चोट थियो।
प्रहरीले त्यसपछि तीनै जनालाई गाडीमा हालेर हेटौंडा अस्पतालमा पुर्याएको डिएसपी अर्यालले बताए।
हेटौंडा अस्पतालबाट थप उपचारका लागि चोर भनिएको व्यक्तिलाई राति पौने २ बजे चितवनको भरतपुर अस्पताल रिफर गरियो।
उपचारका क्रममा उनको टाउको फुटेको र रगत जमेको खुलेको डिएसपी अर्यालले बताए।
‘उनको अवस्था गम्भीर नै छ। हाम्रो अर्को टोली घटनास्थलमा गएर अनुसन्धान गर्दैछ,’ उनले भने।
त्यस्तै मिनबहादुरको पनि करङको हड्डी भाँचिएको छ।
उनीहरू भने बोल्न सक्ने अवस्थामा छन्। हेटौंडा अस्पतालमै उनीहरूको उपचार जारी छ।
शुक्रबार बिहान फेरि घरमा पुगेको टोलीले घरबाहिर एउटा झोला फालेको अवस्थामा फेला पारेको थियो।
त्यो झोलाभित्र एउटा पासपोर्ट फेला पर्यो। जुन पासपोर्ट भ्लोन दम्पतीकै छोराको थियो। ३९ वर्षीय भरथकुमार भ्लोन दुई वर्षदेखि घर फर्किएका थिएनन्।
गएराति आएका व्यक्ति छोरा नै भएको प्रहरीको प्रारम्भिक अनुसन्धानमा खुलेको हो।
‘मास्क लगाएर आएको भएर नचिनेको भनेका छन्। अहिले हामीले सोध्दा आमाले भरथ भन्ने जेठो छोरा भन्नुभएको छ,’ डिएसपी अर्यालले भने, ‘यसबारे हामीले अनुसन्धान गरिरहेका छौं।’
भरथ घरमा चोरी नै गर्न आएका थिए/थिएनन् भन्नेबारे पनि यकिन भने भइसकेको छैन। प्रहरीले यसबारे पनि अनुसन्धान अघि बढाएको छ। प्रहरीले घटनास्थलबाट मोबाइल पनि फेला पारेको थियो।
भरथका परिवार काठमाडौंमा बस्ने हुँदा प्रहरीले सम्पर्कको प्रयास गरिरहेको छ। तर सम्पर्क हुन सकेको छैन।
-1740722146.jpg)
