उत्तरीपूर्वी सिन्धुपाल्चोकको भैरवकुण्ड केन्द्र गरी शुक्रबार बिहान भूकम्प गयो।
बिहान २ः१५ बजे भोटेकोशी गाउँपालिका वडा नम्बर २ भैरवकुण्ड केन्द्रविन्दु भएको ६.१ म्याग्निच्युडको भूकम्प गएको थियो।
भूकम्पको कम्पन सिन्धुपाल्चोक आसपासका जिल्ला मात्र नभई काठमाडौं उपत्यका, कोशी र मधेस प्रदेशसम्म महसुस गरिएको थियो। ठूलो धक्का महसुस गरिए पनि भूकम्पबाट उल्लेखनीय क्षति भएको छैन। सिन्धुपाल्चोकमै एकजना कैदीको हात भाँचिएको छ। भोटेकोशी गाउँपालिका वडा नम्बर ३ तुसारेमा सुख्खा पहिरो खसेको छ।
त्यसबाहेक थप क्षतिको विवरण प्राप्त भएको छैन।
भूकम्पको जोखिममा नेपाल विश्वकै ११ औं स्थानमा छ। गत पुस २३ गते चीनको डिंगे काउन्टीमा गएको ७.१ म्याग्निच्युडको भूकम्पको पनि यहाँ असर परेको थियो। भोटेकोशी गाउँपालिकामै एउटा प्रहरी चौकीको भित्ता चर्किएको थियो।
शुक्रबार गएको नयाँ भूकम्प हो कि, पुरानै भूकम्पको परकम्प हो भनेर हामीले राष्ट्रिय भूकम्प मापन तथा अनुसन्धान केन्द्रका वरिष्ठ भूगर्भविद् लोकविजय अधिकारीलाई सोधेका थियौं।
उनले यो नयाँ भूकम्प नभएको बताए।
‘यो २०७२ वैशाख १२ गते उत्तरी गोरखाको बारपाक केन्द्रविन्दु गरी गएको भूकम्पको परकम्प हो। नयाँ भूकम्प होइन,’ उनले भने।
२०७२ वैशाख १२ गते बारपाक केन्द्रविन्दु भएको ७.८ म्याग्निच्युडको भूकम्प गएको थियो। त्यस भूकम्पबाट करिब ९ हजार जना मानिसको मृत्यु भएको थियो।
शुक्रबार बिहानको कम्पनपछि पनि परकम्पहरू गइरहेको वरिष्ठ भूगर्भविद् अधिकारीले बताए।
‘४ म्याग्निच्युडभन्दा माथिको भूकम्प त गएको छैन। त्यसभन्दा मुनिका परकम्प गइरहेको छ,’ उनले भने, ‘बिहान ८ः१५ बजेसम्म २४ वटा परकम्प गएका छन्।’
