स्याङ्जामा रेबिजको लक्षण देखिएका जनावर किनबेच गरेको आरोपमा दुई जना पक्राउ परेका छन्।
संक्रामक रोग फैलाउन नहुने कसुर गरेको भन्दै दुई जनालाई पक्राउ गरी अनुसन्धान अघि बढाएको जिल्ला प्रहरी कार्यालयका डिएसपी हरिप्रसाद पौडेलले जानकारी दिए।
वालिङ नगरपालिका-५ बस्ने ५५ वर्षीय राजेन्द्र केसी र वडा ८ का ५० वर्षीय शंसुदिन मियाँ पक्राउ परेका हुन्। उनीहरू गत मंगलबार पक्राउ परेका हुन्।
डिएसपी पौडेलका अनुसार राजेन्द्र केसीले रेबिज लागेका घरपालुवा जनावर बेच्दैछ भन्ने सूचना प्रहरीले पाएको थियो।
एउटा भैँसी, एउटा पाडा, एउटा बाख्रा र एउटा पाठी केसीले मियाँलाई बेचिसकेका थिए। ती जनावरलाई ग २ च २७६० नम्बरको गाडीमा राखेर वालिङ बजार हुँदै भीरकोट नगरपालिका बयरघारीतर्फ लग्दै गरेको थाहा पाएपछि प्रहरी खटिएको थियो।
प्रहरीले उक्त गाडीमा ती जनावर मृत फेला पारेको थियो। जनावर बरामद गरी पशु प्राविधिक टोलीले परीक्षण गर्दा रेबिज लागेको पुष्टि भएको थियो।
अनुसन्धानमा संलग्न एक अधिकारीका अनुसार एउटा भैँसीलाई कुकुरले टोकेको थियो। कुकुरले टोकेपछि जनावर मर्ने थाहा पाएर केसीले मर्नुअघि नै बेच्ने योजनाअनुसार काम अघि बढाएको ती अधिकारीले बताए।
यसमा प्रहरीले थप अनुसन्धान अघि बढाएको प्रहरीले जनाएको छ।
