सशस्त्र प्रहरी बल नेपालले पशुपतिमा महाशिवरात्रि पर्वको सुरक्षाका लागि १ हजार ३ सय जनशक्ति परिचालन गरेको छ।
सुरक्षाका लागि सशस्त्र प्रहरी बल, स्वास्थ्यकर्मी तथा एम्बुलेन्ससहित करिब १ हजार ३ सय जनशक्ति परिचालन गरेको हो।
सशस्त्र प्रहरी बल नेपालले सिनामंगलस्थित नम्बर २० विपद् उद्धार गणका गणपति सशस्त्र प्रहरी उपरीक्षक शैलेश श्रेष्ठको कमाण्डमा जनशक्ति परिचालन गरेको सशस्त्र प्रहरीका सहप्रवक्ता डिएसपी शैलेन्द्र थापाले जानकारी दिए।
'शिवरात्रीको दिन स्वेदश तथा विदेशबाट दर्शन गर्न आउने भक्तजनहरूलाई सुरक्षा दिन मंगलबार १० बजेदेखि नै सुरक्षाकर्मी परिचालन गरिएको छ,' उनले भने।
बुधबार महाशिवरात्रि पर्व मनाइँदैछ।
ओभरल कमाण्ड नम्बर ९ पशुपतिनाथ बाहिनी मुख्यालय काठमाडौंले गर्नेछ। उपत्यकास्थित सशस्त्र प्रहरी बल नेपालको विभिन्न कार्यालयहरुबाट एक सिफ्टमा ३ सय भन्दा बढी सशस्त्र प्रहरी परिचालन हुने उनले जानकारी दिए।
उनका अनुसार महाशिवरात्रिका दिन पशुपतिनाथ मन्दिरमा दर्शन गर्न आउने भक्तजनहरूको सुरक्षा र आसपासका क्षेत्रहरूमा हुनेसक्ने आपराधिक क्रियाकलापहरू रोक्न सादा पोशाकमासमेत सशस्त्र प्रहरी परिचालन गरिएको छ।
सादा पोशाकमा परिचालन भएका सुरक्षाकर्मीले त्यस क्षेत्रमा भएका कामकारवाहीहरूको सुक्ष्म रुपले खबर संकलन गर्नेछ।
त्यसैगरी आवश्यक परेको समयमा थप मद्दतको लागि नं. १९ बगलामुखी विशेष कार्यदल गण हलचोकमा ३ प्लाटुन सुरक्षा फौज तयारी अवस्थामा राखिएको डिएसपी थापाले जानकारी दिए।
पर्व अवधिभर भक्तजनको सहजताको लागि सशस्त्र प्रहरी बल नेपालले खानेपानी तथा घुम्ती शौचालयसमेत व्यवस्था गरेको छ। नेपाल एपीएफ अस्पतालका स्वास्थ्यकर्मीसहित हेल्थ डेस्क स्थापना गरेको उनले बताए।
'हेल्थ डेस्कबाट ४ जना चिकित्सकसहित २५ जनाले मेला अवधिभर स्वास्थ्य सेवा प्रदान गर्नेछन्,' उनले भने, '१५ जनाको टोली आवश्यक सामाग्रीसहित तयारी अवस्थामा राखिएको छ।'
-1739338476.jpg)
