प्यूठानमा घरभित्रै मृत भेटिएका दम्पतीको घन प्रहार गरी हत्या भएको खुलेको छ।
माण्डवी गाउँपालिका-२ रातमाटेमा ६० वर्षीय रामबहादुर परियार र उनकी ५६ वर्षीया श्रीमती हुकुमा परियार शनिबार दिउँसो आफ्नै घरभित्र मृत फेला परेका थिए।
प्यूठानका प्रहरी प्रमुख डिएसपी दिपेश बस्यालले परियार दम्पतीमाथि घन प्रहार भएको पुष्टि भएको जानकारी दिए।
हत्यामा प्रयोग भएको घटना भएको घरदेखि ५० मिटर पूर्वमा रगत लागेको अवस्थामा घन बरामद डिएसपी बस्यालले जानकारी दिए।
शनिबार दिउँसो १२ बजेसम्म पनि घरको ढोका नखोलेपछि रामबहादुरका छिमेकी उनलाई बोलाउन गएका थिए। ढोका ढकढकाएर बोलाउँदा नबोलेपछि ती छिमेकीले ढोकाबाटै चिहाएर भित्र हेरेका थिए।
उनीहरू मृत देखेपछि प्रहरीमा खबर भएको थियो।
डिएसपी बस्यालले दुवै मृतकको शरीर र टाउकोमा गम्भीर घाउ खतहरु देखिएको बताएका छन्।
घटना अनुसन्धानका लागि भैरहवाबाट तालिमप्राप्त कुकुर झिकाइएको तथा केहीलाई सोधपुछ भइ रहेको डिएसपी बस्यालले बताए।
‘हामीले शंकास्पद व्यक्तिहरूसँग सोधपुछ गरिरहेकाका छौं,’डिएसपी बस्यालले भने, ‘घटनाको अनुसन्धान भइरहेको छ।’
डिएसपी वस्यालका अनुसार त्यो घरमा बुढाबुढी मात्रै थिए। उनीहरुका चार छोरा भारतमा बस्छन्। दुई छोरी बिबाह भई दाङ बस्छन्।
