भारतको ओडिसास्थित कलिंगा इन्स्टिच्युट अफ् इण्डस्ट्रियल टेक्नोलोजी (केआइआइटी) को छात्रावासमा विद्यार्थी प्रकृति लम्साल मृत भेटिएलगत्तै निकालिएका विद्याथीहरू फर्किन थालेका छन्।
भारतस्थित नेपाली दूतावासका काउन्सिलहरू सञ्जीव शर्मा दास र नविन अधिकारीसँग सोमबार साँझ र मंगलबार दिनभर भएको संवादपछि विद्यार्थीहरू होस्टेल फर्किन थालेका हुन्।
दास र अधिकारीले विद्यार्थीहरूसँग कुराकानी गर्नुका साथै कलेज प्रशासन र ओडिसा प्रहरीका अधिकारीहरूसँग पनि छलफल गरेका थिए।
'कलेज प्रशासनले हामीलाई पुरै सुरक्षा दिने बताएपछि आआफ्ना होस्टेल फर्किन थालेका छौं,' एक विद्यार्थीले सेतोपाटीसँग भने,'अहिलेसम्म सय जनाजति फर्किएका छौं,अरू पनि आउँदै हुनुहुन्छ।' बिटेक पहिलो वर्षदेखि पिएचडीसम्म केआइआइटीमा १४ सय बढी विद्यार्थी अध्ययनरत छन्।
होस्टेलबाट जबरजस्ती निकालिएपछि करिब दुई सय विद्यार्थी नेपाल फर्किसकेका छन्। नेपाल फर्किएका विद्यार्थीहरूलाई पनि कलेज प्रशासनले आउनेजाने खर्च व्यहोर्ने भन्दै कलेज फर्किन आह्वान गरेको छ।
घटनाको छानबिनका लागि ओडिसा प्रहरीले तीन सदस्यीय समिति पनि बनाएको छ। प्रारम्भिक अनुसन्धानमा कलेजकै सहपाठी युवकको यातनाका कारण उनले आत्महत्या गर्न बाध्य भएको खुलेको छ। भारतीय प्रहरीले ती युवकलाई पक्राउ गरी अनुसन्धान जारी राखेको छ।
यस्तै केआआइटीले दिवंगत विद्यार्थी प्रकृति लम्सालको स्मरणमा नेपाली विद्यार्थीका लागि विशेष छात्रवृत्ति दिने घोषणा पनि गरेको छ।
'केआइआइटीका प्राध्यापक अच्युत सामन्तले प्रकृतिका बुवा र काकालाई भेटेर कलेजले प्रकृतिको सपनालाई मर्न नदिने वाचा गर्नुभयो,' कलेजले सामाजिक सञ्जाल एक्समा लेखेको छ,'प्रकृतिको बुवाको इच्छाअनुसार कलेजले नेपाली विद्यार्थीका लागि प्रकृति लम्सालको स्मृतिमा छात्रवृत्तिको व्यवस्था गर्छ।'
