समाचारको सम्पादन गर्ने ठाउँमा महिलाको सहभागिता कम हुँदा मूलधारका सञ्चार माध्यममा महिला राजनीतिकर्मी, महिला उद्यमीको समाचारले कम प्राथमिकता पाएको सरोकारवालाले बताएका छन्।
मिडिया एड्भोकेसी ग्रुपद्वारा आज ललितपुरमा आयोजित कार्यक्रममा सञ्चार तथा सूचनाप्रविधि मन्त्रालयका सचिव राधिका अर्यालले समाचारको सम्पादन गर्ने ठाउँमा महिलाको सहभागिता कम हुँदा मूलधारका सञ्चारमाध्यममा महिला राजनीतिकर्मी, महिला उद्यमीको समाचारले कम प्राथमिकता पाएको बताएकी हुन्।
उनले सामाजिक सञ्जालको प्रभावका कारण दैनिक पत्रिकाका पेज घट्दा पनि महिलाका विषयले समाचारमा कम प्राथमिकता पाएको धारणा राखिन्।
सचिव अर्यालले महिलाका चासो, सरोकार र हितका पक्षमा सञ्चार माध्यमले ध्यान दिनुपर्नेमा जोड दिइन्।
‘राजनीतिक क्षेत्रमा मात्रै नभएर अन्य क्षेत्रमा पनि महिलाका मुद्दा उठेका छन् कि छैनन् भनेर ध्यान दिनुपर्छ,’ उनले भनिन्।
नेपाल पत्रकार महासङ्घका अध्यक्ष निर्मला शर्माले महिलालाई राजनीतिक तहमा निर्णायक भूमिकामा स्थापित गर्न सञ्चारमाध्यमको हस्तक्षेपकारी भूमिका आवश्यक रहेको बताइन्।
उनले महिलाका मामिलामा विषयगत विज्ञता भएका संस्थहरूसँग समन्वय गरेर काम गर्न आवश्यक रहेको समेत बताइन।
‘विगतमा प्रतिनिधि सभा र राष्ट्रिय सभा मात्रै राजनीतिक समाचार सम्प्रेषणका माध्यम थिए, राजनीतिक समाचार सम्प्रेषण गर्नका लागि अहिले धेरै अवसरहरू छन्,’ उनले भनिन्,‘महिलाका समाचारलाई प्राथमिकतामा राख्ने सन्दर्भमा समाचारदातालाई सञ्चार माध्यमले दिने जिम्मेवारी र उनीहरूको इच्छाशक्तिमा पनि भरपर्छ।’
न्यूनतम पारिश्रमिक निर्धारण समितिका अध्यक्ष सङ्गीता खड्काले सञ्चार माध्यममा राजनीतिक क्षेत्रका महिलाका समाचार बढाउन महिला पत्रकारलाई पर्याप्त तालिम दिनुपर्ने आवश्यकता रहेको बताइन्।
महिलाका सवाल र राजनीतिक चासोका विषयलाई मूलधारका सञ्चार माध्यममा प्राथमिकताका साथ समेट्न ध्यान दिनुपर्ने उनको भनाइ थियो।
मिडिया एड्भोकेसी ग्रुपका अध्यक्ष अनिता विन्दुले सञ्चार माध्यममा महिला राजनीतिकर्मीका समाचार र महिला पत्रकारको सहभागितालाई आधार बनाएर सन् २०२४ नोभेम्बर २० देखि २०२५ जनवरी २० सम्म गरेको मिडिया अनुगमनका आधारमा महिला लक्षित समाचार ११ दशमलव ७४ प्रतिशत रहेको पाइएको बताइन्।
