भारतको ओडिसास्थित कलिंग इन्स्टिच्युट अफ इन्डस्ट्रियल टेक्नोलोजी (किट) मा मृत्यु भएकी प्रकृति लम्सालका बुवा सुनिलले न्याय चाहिएको बताएका छन्।
भारतको समाचार संस्था एएनआईसँग कुराकानी गर्दै आफूहरूले यस घटनापछि न्याय मात्रै खोजेको बताएका हुन्।
पत्रकारले उनलाई सोध्छन्, ‘तपाईंको माग के हो?’ जबाफमा लम्सालले भन्छन्, ‘हाम्रो डिमान्ड जस्टिस हो, जस्टिस मात्रै!’
आफूसँग कलेज र प्रहरी प्रशासनले समन्वय गरिरहेको पनि उनले पत्रकारसँग भनेका छन्। उनले आफूलाई घटनाबारे अर्का छोराले जानकारी गराएको पनि बताएका छन्।
‘युनिभर्सिटीसँग हिजो कुरा भएको थियो। उनीहरूले आधिकारिक रूपमा केही भनेनन्। तर समन्वय गरिरहेका छन्। यहाँको प्रशासन र कलेजले पनि समन्वय गरिरहेको छ। भाइ पनि यहीँ पढ्थ्यो, उनैले फोन गरेर तुरून्त आउनुपर्यो भनेका थिए। त्यसपछि हामी आएका हौं,’ उनले भने।
त्यस्तै अनुसन्धानका लागि प्रहरीले प्रकृतिको मोबाइल, डायरी, ल्यापटप लगेर फरेन्सिक जाँच गराएको र अहिले पोष्टमर्टम भइरहेको पनि उनले बताए।
‘हामीसँग यतिमात्रै सूचना छ कि दुर्व्यवहार र इमोशनल ब्ल्याकमेलिङ गरेकाले उसले आत्महत्या गरेकी हुन्। हामीलाई यतिमात्रै थाहा छ, अन्य कुरा केही पनि थाहा छैन,’ उनले भने, ‘एक जनालाई पक्राउ गरेको छ। अहिलेसम्म उसकै कारणले भएको भनिएको छ, अनुसन्धान भइरहेको छ।’
उक्त घटनापछि कलेज प्रशासनले नेपाली विद्यार्थीहरूलाई फिर्ता जान भनेको विषयमा पनि आफूले थाहा पाएको र त्यसो गर्नु उचित नहुने पनि उनले बताए।
