अभिनाश झा मधेसका चर्चितमध्येका कलाकार हुन्। उनी दर्शकमाझ 'कलकतियावाली' को नामले परिचित छन्। नाटक र सिरियलहरूमा काम गर्दै उनले कलाकारितामा आफ्नो बेग्लै पहिचान बनाएका छन्।
हालसालै जनकपुरमा उनको चर्चा अलि धेरै नै भयो। यो चर्चा उनको अभिनय वा कलाले होइन, वास्तविक जीवनको घटनाले पाएको हो।
गत माघ १४ गते अभिनाशले महोत्तरीको बर्दिबास नगरपालिकास्थित पञ्चधुरामाई मन्दिरमा बिहे गरे। उनले आफूसँगै अभिनय गरिरहेकी अनिषा सदा (अन्सा) सँग बिहे गरेका हुन्। अनिषा सामाजिक एवं आर्थिक रूपमा पिछडिएको मुसहर समुदायकी हुन् भने अभिनाश मधेसी ब्राह्मण समुदायका।
यी दुई कलाकारहरूको बिहे योजनाबद्ध भए पनि आफन्त र निकटका बाहेकलाई थाहा थिएन।
'एक त अन्तरजातीय बिहे थियो, अर्कातिर हामी कलाकार। भिडभाडको पनि डर भयो। सामाजिक प्रतिक्रियाको पनि। त्यसैले होहल्ला नगरी बिहे गर्यौं,' अभिनाशले भने।
उनीहरूको बिहेको फोटो तथा भिडिओ सार्वजनिक भएपछि पनि धेरैले पत्याएनन्। अभिनास र अनिषाले सँगै अभिनय गरिरहेकाले कतिले त उनीहरूको बिहेलाई 'सुटिङ' नै ठाने।
यसरी सँगै काम गर्दागर्दै जीवन पनि सँगै बिताउने निधो गरेका अभिनाश र अनिषा आफूहरूले सहमतिमा बिहे गर्ने निधो गरेको बताउँछन्। उनीहरूका अनुसार दुई जना सहकर्मी भए पनि प्रेमी थिएनन्।
चार वर्षदेखि उनीहरू एउटै कला समूहमा रहेर काम गरिरहेका थिए।
अभिनय क्रममा अनिषा अभिनाशकी बहिनी, छोरी, बुहारी, श्रीमती लगायत विभिन्न भूमिका निर्वाह गर्थिन्।
'वास्तविक जीवन त अभिनयभन्दा धेरै फरक हुँदो रहेछ। अब भित्री मनबाट आफ्नोपन महसुस भइरहेको छ,' अनिषाले भनिन्, 'मैले सधैं उहाँलाई सर भन्थेँ। श्रीमान बन्नुहोला भनेर त सोचेकै थिइनँ। उहाँ मलाई राम्रो मान्छे लाग्थ्यो। अचानक एकदिन बिहेको प्रस्ताव राख्नुभयो। मैले मजाक नै ठानेकी थिएँ।
एक वर्षयता अभिनाशको बिहेका लागि परिवार केटीको खोजीमा थिए। तर अभिनाशको कामकै कारण घरजममा मुस्किल भयो। कलकतियावाली बन्दा अभिनाश महिलाको रूपमा हुन्छन्।
'महिलाको हुलियामा अभिनय गर्ने भएकाले धेरैले मेरो लैंगिकतामा आशंका गर्थे। कलाकारको विश्वास हुँदैन भन्थे,' अभिनाशले भने, 'कलाकारिता नबुझेको मान्छेसँग बिहे गरेँ भने पछि मलाई झन् गाह्रो हुन्छ भन्ने लाग्यो। झन् मेरो त भूमिका महिलाको छ। यसमा रोकतोक भयो भने के गर्ने होला भन्ने सोचेँ। अनि मैले कलाकारसँगै बिहे गर्छु भन्ने ठानेँ।'
अभिनाशका अनुसार गत पुस पहिलो साता उनले अनिषालाई प्रस्ताव गर्ने सोचे।
उनलाई अनिषाको बानी, व्यवहार र अभिनय मनपर्थ्यो। बिहे प्रस्ताव गर्ने अघिल्लो उनी रात सुतेनन्, निद्रै लागेन। उनलाई डर लागिरहेको थियो, तैपनि हिम्मत गरे। दिनभर सँगै भिडिओ सुट सकेर अभिनाश साँझतिर अनिषाको डेरा पुगे।
अनि बिहेको प्रस्ताव राखे।
सुरूमा त अनिषा झस्किइन्। मजाक भन्ठानिन्। अभिनाशले गम्भीर भएर साँच्चै भनेको भने।
धेरैबेर कुरा चलेपछि अनिषाले भनिन्, 'मलाई पनि तपाईं मनपर्छ तर मेरो घरमा मानेनन् भने?'
अभिनाशले भने, 'नमाने जबर्जस्ती छैन नि।'
भोलिपल्ट राति अनिषाले यो कुरा आमालाई सुनाइन्। आमाले पछि धोका दिने हो कि भनेर आशंका व्यक्त गरिन्। अनिषाले अभिनाशप्रति विश्वास रहेको बताइन्। आमाले उनको मन बुझेर सहमति दिइन्। अभिनाशले पनि आफ्ना आमाबुबासँग कुरा गरे र सहमति पाए।
यसपछि निर्देशक अरूण विजयासँग अभिनाश धनुषाधामस्थित मुसहरी टोल पुगे। अनिषालाई कहिल्यै नछोड्ने भन्दै उनका आमाबुबा सामु बाचा गरे।
'दाइजो, लुगा केही लिन्नँ, सबथोक मै गर्छु भनेर फर्किएँ,' अभिनाशले भने।
यसरी अनिषा र अभिनाशको जोडी बाँधियो।
बिहेपछि समाजबाट सकारात्मक र नकारात्मक दुवै खालका टिप्पणी सुन्नुपरेको अभिनाश बताउँछन्।
अनिषाको टोलमा भने सबै खुसी रहेको उनले बताइन्। उनको टोलमा बीस वर्ष उमेर पुगेर बिहे गर्ने उनी एक्ली युवती हुन्।
'मेरो गाउँमा १५/१६ वर्ष उमेर नपुग्दै केटीहरूको बिहे हुन्छ। मेरो पनि १३/१४ वर्षकै उमेरमा बिहेको कुरा चलेको थियो। म रोएर रोकिएको थियो। मेरा आमाबुबा समझदार हुनुहुन्छ। मलाई विश्वास गरेर घरबाट बाहिर काम गर्न पठाउनुभयो। अहिले मेरो रोजाइ अनुसार बिहे गर्न दिनुभयो,' अनिषाले भनिन्।
