पश्चिमी न्यूनचापीय प्रणालीको प्रभावसँगै काठमाडौंमा चिसो महसुस भएको छ। शुक्रबारदेखि नै काठमाडौंमा चिसो महसुस गरिएको थियो।
आगामी केही दिनसम्म पश्चिमी न्यूनचापीय प्रणालीको प्रभाव रहने भएकाले काठमाडौंमा चिसो महसुस हुने वरिष्ठ मौसमविद् शान्ति कँडेलले जानकारी दिइन्।
‘नेपालको मौसममा पश्चिमी न्यूनचापीय प्रणालीको प्रभाव छ। आज गण्डकी, कर्णाली प्रदेशका एक–दुई स्थानमा वर्षा र उच्च हिमाली क्षेत्रमा हिमपातको सम्भावना छ। पश्चिमी न्यूनचापीय प्रणालीका कारण हिमाली भेग हुँदै हावा बहने कारण पनि चिसो महसुस गरिएको छ। साथै हिमाली भेगमा हिमपात भइरहेकाले चिसो बढ्न सघाएको छ,’ उनले भनिन्।
केही दिनअघि काठमाडौंमा तापक्रम बढेको थियो। अहिले त्यसमा केही गिरावट आएको छ।
सोमबार बिहान ८ः४५ बजे काठमाडौंको कीर्तिपुरको तापक्रम ७.६ डिग्री सेल्सियस थियो। नगरकोटको ५.५ डिग्री सेल्सियस थियो। ललितपुरको खुमलटारको तापक्रम ८ डिग्री सेल्सियस थियो।
पछिल्लो तीन घन्टामा मुलुकका केही भागमा फाट्टफुट्ट वर्षा भइरहेको छ। सोमबार बिहान मकवानपुरको दामन, पाल्पाको बल्ड्याङगढी केन्द्रमा मौसम वर्षा भएको रेकर्ड भएको छ।
हावापानी विश्लेषण शाखाका अनुसार शनिबार र आइतबारको २४ घन्टाको अवधिमा १० वटा केन्द्रमा १ मिलिमिटरभन्दा बढी पानी परेको छ।
सबैभन्दा बढी मनाङको ताल केन्द्रमा ६.८ मिलिमिटर वर्षा मापन भएको छ।
पछिल्लो केही दिन पश्चिमी तथा पूर्वी भागमा फाट्टफुट्टदेखि हल्का वर्षा भए पनि यस वर्षको हिउँद याम सुख्खा नै रहेको छ।
औसतभन्दा धेरै कम वर्षा भएको छ। विभागका अनुसार यस वर्षको हिउँदयाम (मंसिर १६देखि फागुन ४ गतेसम्मको अवधिमा)मा ५.७० मिलिमिटर वर्षा भएको छ। हिउँद याममा सरदर ६०.१ मिलिमिटर वर्षा हुनुपर्नेमा यस वर्ष अहिलेसम्म ९.५ प्रतिशतमात्रै वर्षा भएको छ।
जसका कारण वायुमण्डलमा धुलो, धुवाँका कणहरू थुप्रिएर बसेका छन्।
‘त्यसले पनि चिसो बढाइरहेको छ। पानी परेर वायुमण्डल सफा हुने हो भने न्यानो महसुस हुन्थ्यो,’ वरिष्ठ मौसमविद् कँडेलले बताइन्।
वातावरण विभागका अनुसार पछिल्लो २४ घन्टामा पोखरा सबैभन्दा प्रदूषित सहर बनेको छ। गण्डकी बोर्डिङ स्कुल केन्द्रमा मापन गरिएको विवरणअनुसार त्यहाँको एक्युआई (वायुको शुद्धता सूचकांक) ४८८ पुगेको थियो। पछिल्लो एक घन्टामा भक्तपुरको एक्युआई २२०, काठमाडौंको शंखपार्कको १९०, ललितपुर, खुमलटारको १७९, भैँसेपाटीको १७८, रत्नपार्कको १७७, भरतपुरको १७६, धनगढीको १७३, हेटौंडाको १६८ छ।
वायु गुणस्तर सूचकांक ०–५० हुँदा राम्रो, ५१–१०० हुँदा मध्यम, १०१–१५० हुँदा संवेदनशील समूहका लागि अस्वस्थ, १५१–२०० अस्वस्थ, २०१ – ३०० निकै अस्वस्थ तथा ३०१ भन्दा माथि भएमा खतरनाक तह पुगेको संकेत गर्दछ।
वरिष्ठ मौसमविद् कँडेलका अनुसार यो साताभरि नै बदलीको सम्भावना छ। काठमाडौंमा मंगलबार मौसम केही खुलेको देखिए पनि बुधबारदेखि पुन: बदलीको सम्भावना छ।
तथापि यो प्रणालीले काठमाडौंमा पानी पार्ने सम्भावना नरहेको उनले बताइन्।
अर्का मौसमविद् विनोद पोखरेलले भने बिहीबार काठमाडौंमा वर्षा हुने सम्भावना देखाएका छन्। उनले मंगलबार उत्तरी भेगमा बदली र वर्षाको सम्भावना रहेको पनि बताएका छन्।
‘मंगलबारदेखि मुख्यतया नेपालको उत्तरी भागहरूमा बढी वर्षा हुनेछ। यो हप्ताभरि जारी रहन सक्ने अनुमान गरिएको छ। त्यसैले देशका अधिकांश भागहरूमा बादल लागेको मौसमसँगै चिसो मौसमको सम्भावना छ। काठमाडौंमा बिहीबार हल्का वर्षा हुन सक्छ,’ उनले भनेका छन्।
-1737613264.jpg)
