रुपन्देही प्रहरीले अवैध लागू औषध चरेस र गाँजा कारोबारमा संलग्न सात जनालाई पक्राउ गरेको छ।
शुक्रबार बिहान जिल्ला प्रहरी कार्यालय रुपन्देही र लागु औषध नियन्त्रण ब्युरो शाखा कार्यालय भैरहवाबाट खटिएको प्रहरी टोलीले सिद्धार्थनगर र तिलोत्तमा नगरपालिकाबाट चरेस र गाँजासहित उनीहरुलाई पक्राउ गरेको हो।
जिल्ला प्रहरी कार्यालय रुपन्देहीका प्रहरी निरीक्षक महेन्द्र सेनकाअनुसार प्रहरीले २० किलो बढी चरेस र २१ किलो गाँजासहित उनीहरुलाई पक्राउ गरेको हो।
पक्राउ पर्नेहरूमा धादिङको गजुरी गाउँपालिका-८ बस्ने ३३ वर्षीय दीपक तामाङ, ३६ वर्षीय सुनबहादुर तामाङ, ३१ वर्षीय नक्कलबहादुर तामाङ, ४१ वर्षीय प्रेमलाल तामाङ छन्।
त्यस्तै रुपन्देहीको सिद्धार्थनगर नगरपालिका- ४ आदर्शनगर बस्ने २५ वर्षीय जीवन मल्लाह, तिलोत्तमा नगरपालिका- १४ बस्ने २३ वर्षीय दिलिप केवट र स्याङ्जाको गल्याङ्ग नगरपालिका-१ बस्ने ३८ वर्षीय जीवनाथ पाण्डे रहेको प्रहरी निरीक्षक सेनले जानकारी दिए।
प्रहरीले उनीहरुको साथबाट चरेस र गाँजासँगै लागुऔषध पोल्याण्डजस्तो देखिने ८४ ग्राम धुलो पदार्थ पनि बरामद गरेको छ।
सिद्धार्थनगर नगरपालिकाको वडा नम्बर ४, ८ तिलोत्तमा नगरपालिका वडा नं. १५ मा लागु औषध कारोबार हुँदैछ भन्ने गोप्य सूचनाका आधारमा गएको प्रहरी टोली लागूऔषधसहित उनीहरुलाई पक्राउ गर्न सफल भएको हो।
सिद्धार्थनगर नगरपालिका वडा नं. ८ लुम्बिनी रोडमा रहेको चन्द्रसूर्य होटलमा चरेसको कारोबार हुँदैछ भन्ने सुराकी पाएर गएको प्रहरी टोलीले होटलबाट चरेससहित चार जनालाई पक्राउ गरेको थियो।
सोही क्रममा भागेका अरु तीन जनालाई पनि सिद्धार्थनगर ४ र तिलोत्तमा १५ बाट पक्राउ गरिएको प्रहरीले जनाएको छ।
पक्राउ परेका सबैलाई अदालतबाट म्याद थप गरी अनुसन्धान सुरु गरिएको प्रहरी निरीक्षक सेनले बताए। बरामद गरिएको चरेस र गाँजा जिल्ला प्रहरी कार्यालयमा राखिएको छ।
बरामद गरिएको चरेसको अवैध बजार मुल्य नेपालमा ९ लाख रुपैयाँ भन्दा धेरै पर्छ। नेपालमा भन्दा चरेसको अवैध मूल्य भारतमा बढी भएकोले धादिङको गजुरीबाट भैरहवा हुँदै भारततर्फ लैजाने क्रममा उक्त परिमाणको चरेस बरामद भएको हो।
उनीहरुले बुधवार नै होटलको एउटा कोठा बुक गरेका थिए।
होटलमा कोठा बुक गर्दा काठमाडौं महानगरपालिका बालाजु बस्ने सुजन लामा र धादिङ गजुरी गाउँपालिका–८ का दीपक तामाङको नाम होटलको विवरण पुस्तिकामा लेखिएको छ। पक्राउ गरिएका सबैजना चरेसको कारोबारी भएको र यसबारेमा थप अनुसन्धान भइरहेको प्रहरीले जनाएको छ।
