काठमाडौंबाट त्रिशूली लैजाँदै गरिएको ग्यास सिलिन्डर गाडीमै लिक भएपछि धादिङको धुनीबेसी नगरपालिका-८ बाहुनडाँडामा शुक्रबार केहीबेर सडक अवरूद्ध भएको छ।
शुक्रबार बिहान बा २ ख ४६७३ नं.को ट्रक १७ वटा एमोनियाको ग्यास सिलिन्डर बोकेर त्रिशूली जाँदै थियो। ट्रक बाहुनडाँडा पुगेपछि चालकले ग्यास लिक भएकोबारे प्रहरीलाई जानकारी दिएका थिए।
त्यसपछि सुरक्षाका लागि प्रहरीले दुवैतर्फ सवारी आवागमन रोकेका कारण त्रिभुवन राजपथ केहीबेर अवरूद्ध भएको धादिङका डिएसपी सुवास हमालले जानकारी दिए।
उनका अनुसार गाडिमा रहेकोमध्ये एउटा सिलिन्डरबाट ग्यास लिक भएको थियो।
‘१७ वटा सिलिन्डर राखिएको थियो। त्यसका होल्डर होल्डर ठोक्किएका रहेछन्। एउटाबाट लिक भएछ,’ उनले भने, ‘अरू केही क्षति भएन। गाडी हिँडिसकेको छ।’
इलाका प्रहरी कार्यालय खानिखोलाबाट प्रहरीको टोली खटिएको थियो। केहीबेरमा दमकलको प्रयोग गरी फोम पनि हालिएको थियो।
