काठमाडौंको ठमेलमा प्रहरीमाथि कुटपिट गरेको आरोपमा थप एक जना पक्राउ परेका छन्।
उक्त घटनामा बिहीबार नयाँ बानेश्वरबाट कमलराज जोशीलाई पक्राउ गरिएको जिल्ला प्रहरी परिसर काठमाडौंका एसपी अपिलराज बोहराले जानकारी दिए।
'जोशी उक्त घटनालाई संलग्न भएको देखिएकाले नियन्त्रणमा लिएका हौं,' एसपी बोहराले भने, 'उनको राजनीतिक पृष्ठभूमि के हो भनेर अहिले भन्न सक्दैनौं। अनुसन्धान भइरहेको छ।'
यसअघि अमृत साइन्स क्याम्पस (अस्कल) मा पढ्ने दिनेश सिग्देल र रमेश फुलारा पक्राउ परेका थिए। उनीहरू दुवै जना नेकपा (एमाले) को भ्रातृ संगठन अनेरास्ववियुका नेताहरू हुन्।
उनीहरूले बिहीबार मध्यराति क्युआरटी (क्विक रेस्पोन्स टिम) को रूपमा खटिएका दुई जनामाथि कुटपिट भएको हो।
प्रहरी वृत्त दरबारमार्गबाट प्रहरी हवल्दार जुगलाल घर्ती र प्रहरी जवान नगेन्द्रराज विष्ट मोटरसाइकलमा खटिएका थिए। उनीहरू काठमाडौं महानगर-२७ ज्याठास्थित छाया सेन्टर अगाडि राउण्ड अपका लागि पुगेका थिए।
त्यतिबेला ६/७ जनाको समूह सडकमा अपशब्द बोल्दै हिँडिरहेका थिए। प्रहरीले उनीहरूलाई सम्झाउन खोजेको थियो।
कुटपिट गर्नेहरू अस्कल क्याम्पस पढ्ने विद्यार्थीहरू रहेको खुलेको छ। प्रहरीले सिसिटिभीको माध्यमबाट खोजी गरिरहेको छ।
कुटपिटबाट प्रहरी हवल्दार घर्तीको टाउको र छातीमा चोट र दायाँ गाला सुन्निएको थियो। यस्तै जवान विष्टको दायाँ आँखामुनि सुन्निएको थियो।
क्युआरटी मोटरसाइकलको हेल्मेट, बत्ती र लेगगार्डमा क्षति पुगेको प्रहरीले जनाएको छ। घटनापछि प्रहरी कर्मचारीलाई राष्ट्रिय ट्रमा सेन्टरमा पुर्याइएको थियो।
