स्त्रीरोग विशेषज्ञ डा. नुतन शर्माले गर्भावस्थामा गरिने शारीरिक व्यायाम, हिँडडुल वा अन्य कुनै तरिकाले बच्चाको नर्मल डेलिभरी नहुने बताएकी छन्।
'गर्भावस्थामा ६ महिना हुनेबित्तिकै धेरै महिलाहरू के गरूँ, कति हिँडौं, के काम गरौं, कस्तो खालको कसरत गरौं, ताकि डेलिभरी नर्मल होस् भनेर सोध्न थाल्छन्,' डा. शर्माले सेतोपाटीसँगको कुराकानीमा भनिन्, 'तर तपाईं मलाई विश्वास गर्नुस्, त्यस्तो कुनै पनि तरिकाले नर्मल डेलिभरी हुँदैन।'
'तपाईंले पहिलेदेखि कसरत गरिरहनुभएको छ र त्यसैलाई निरन्तरता दिनुहुन्छ भने त्यो छुट्टै कुरा, तर गर्भवती भएपछि त्यस्तो कुनै उपायले नर्मल डेलिभरी हुन्छ भन्ने छैन,' उनले भनिन्।
डा. शर्माले नर्मल डेलिभरी हुने ४ कारण बताइन्।
उनका अनुसार गर्भवतीको शारीरिक अवस्था ठिक छ, बच्चाको पोजिसन राम्रो छ, पानीको मात्रा पर्याप्त छ र बच्चाको टाउको तल गएर राम्रोसँग बसेको छ भने नर्मल डेलिभरी हुन्छ।
उनले नर्मल डेलिभरी नहुने ४ कारणको पनि जानकारी दिइन्।
उनका अनुसार बच्चा उल्टो छ वा तेर्सो परेर बसेको छ, साल तल छ, महिलाको उमेर बढी भइसकेको छ र पाठेघरको मुख खुल्ने अवस्था देखिँदैन भने नर्मल डेलिभरीको सम्भावना कम हुन्छ।
'नर्मल डेलिभरीका लागि यस्ता सबै तत्त्व मिल्नुपर्छ। सबै सामान्य छ भने नर्मल डेलिभरी हुन गाह्रो छैन। त्यस्तो अवस्थामा नर्मल डेलिभरीलाई रोक्न पनि सकिँदैन। कसैले चाहेर पनि वा घन्टौं घन्टा सलाइन चढाएर पनि नर्मल डेलिभरी हुँदैन। त्यसले त उल्टो बच्चाको स्वास्थ्यमा हानि गर्छ,' डा. शर्माले भनिन्।
'त्यसैले मेरो सुझाव के हो भने, तपाईं गर्भवती हुँदा राम्ररी आफ्नो स्वास्थ्य परीक्षण गराउनुस्, डाक्टरको परामर्श लिइराख्नुस्, अन्तिम समयसम्म सबै कुरा राम्रो भयो भने नर्मल डेलिभरी हुन्छ।'
