रूकुम पूर्वको भूमे गाउँपालिका–४ साकिम गाउँमा मंगलरबार दिउँसो झलमल्ल घाम लागेको थियो। त्यो सुन्दर र शान्त साकिम गाउँको शान्ति दिउँसो साढे दुई बज्दै गर्दा खलबलियो।
गाउँमा क्षणभरमै आतंकको हावा चल्यो। स्थानीय ५१ वर्षीय चन्द्रसिंह पुनले रगताम्मे खुकुरी हावामा उज्याउँदै गर्दा स्थानीय भागे। ढोका थुनेर बसे। पुनले आफैले मान्छे मारेर आएको कुरा आवेग र उत्तेजना पोख्दै नाङ्गो खुकुरी बोकेका थिए।
केहीबेरमै पुनले छिमेकी ६० वर्षीया ढाँटी बुढा र उनका ८ महिनाका नाति समिर बुढाको खुकुरी प्रहार गरी हत्या गरेको कुरा फैलियो। नातिलाई पिँठ्युमा बोकेकै अवस्थामा ढाँटी र समिर सडकमै रगताम्मे भई लडेको कारूणिक दृष्य स्थानीयले देखे।
‘त्यस्तो भयानक र भयपूर्ण दृष्य देखेर को आत्तिँदैन,’ वडाध्यक्ष श्यामप्रसाद बुढाले भने, ‘हजुर आमा र नातिको प्राण पखेरू छैन भन्ने थाहा पाउँदा गाउँमा सन्नाटा छायो।’
वडाध्यक्ष बुढा पनि सोही साकिम गाउँकै हुन्। वडाध्यक्ष बुढाका अनुसार गाउँलेले उनलाई फोन गरी घटनाबारे जानकारी गराएका थिए।
वडाध्यक्ष बुढाका अनुसार ढाँटी नातिलाई पिँठ्यूमा बोकेर भैंसीलाई घाँस हाल्न जाँदै गर्दा उनीमाथि एकाएक खुकुरी प्रहार भएको थियो। त्यसअघि बाटोमा ढाँटी र मदिराले मातेका चन्द्रसिंहको भेट भएको थियो। त्यतिखेर उनीहरूका बीचमा कुनै कुरामा सामान्य वादविवाद भएको अनुमान छ। यद्यपि त्यो घटना प्रत्यक्ष देख्ने भने कोही थिएनन्। त्यतिकैमा चन्द्रसिंह दौडिएर घर गई खुकुरी ल्याएर बाटो क्रस गर्दै गर्दा ढाँटीमाथि प्रहार गरेको वडाध्यक्ष बुढाले बताए।
‘त्यो प्रहारबाट ढाँटीको कानदेखि मुखसम्म र पिँठ्यूमा भएका उनका नाति समिरको नाकदेखि कानसम्म गहिरो घाउ खत लाग्यो। एकै प्रहारमा उनीहरू गर्लम्मै भुइँमा ढले। उनीहरूको जीवन लिला तत्कालै समाप्त भयो,’ वडाध्यक्ष बुढाले भने।
उनले थपे, ‘चन्द्रको त्यो खुकुरी प्रहारबाट आधा बाबुलाई लागेको छ भने आधा बजैलाई लागेको देखिन्छ। बजैमाथि प्रहार गरिएको भए पनि नाति पिँठ्यूमा बोकेको हुँदा बाबुको पनि एकै प्रहारमै सँगै काल हुन पुग्यो।’
घटनाबारे स्थानीयबाट थाहा पाउनासाथ वडाध्यक्षले तत्कालै प्रहरीलाई खबर गरे। तर, हत्या आरोपी चन्द्रसिंह फरार भइसकेका थिए। वडाध्यक्ष बुढाका अनुसार चन्द्रसिंह रक्सीका अम्मली थिए। प्राय: सधैं रक्सी खान्थे। रक्सी खाए पनि उनले यस्तो भयानक रूप त्यसअघि कहिल्यै देखाएका थिएनन्।
वडाध्यक्ष बुढाका अनुसार उनीहरूका बीचमा यसअघि आपसमा कुनै खाले विवाद र पुरानो रिसिबी त्यस्तो केही पनि थिएन।
जिल्ला प्रहरी प्रमुख डिएसपी माधव खरेलले पनि चन्द्रसिंह र ढाँटीको परिवारका बीचमा पहिला कुनै खाले दुस्मनी वा रिसिबी केही थियो भन्ने कुरा खुल्न नआएको बताए।
‘अनुसन्धानबाट उनीहरूका बीचमा पुरानो कुनै दुस्मनी वा रिसिबी थियो भन्ने तथ्य खुल्दैन,’ डिएसपी खरेलले भने ‘मदिराका अम्मली चन्द्रसिंहले त्यो दिन पनि अत्यधिक मदिरा सेवन गरेको हुँदा बाटोमा ढाँटीसँग भेट हुँदा सामान्य कुरामा विवाद हुँदा घरबाट खुकुरी ल्याई एकाएक प्रहार गरेको खुल्छ।’
अस्पतालमै रहेका वडाध्यक्षले बुधबार दिउँसो १ बजेतिर ढाँटी र उनका नाति समिरको जिल्ला अस्पताल रूकुमकोटमा पोष्टमर्टमको प्रक्रिया सुरू भएको बताए।
उनीहरूको हत्या गर्ने चन्द्रसिंहको अझै अस्पतालबाट रिपोर्ट आउन बाँकी छ। उनको शव पोष्टमर्टम गर्ने ठाउँमा ल्याइएको छैन।
सबैको पोष्टमर्टमपछि तीनै जनाको सँगै दाहसंस्कार गर्ने कि, भन्नेबारे कुराहरू भए पनि यकिन भइनसकेको वडाध्यक्ष बुढाले बताए।
ढाँटी र उनका नाति समिरको खुकरी प्रहार गरी भागेको चन्द्रसिंह पनि घरदेखि आधा घन्टा टाढाको खुलखुले खोलामा टाउकोमा चोटग्रस्त अवस्थामा मृत फेला परेका थिए।
डिएसपी खरेलका अनुसार उनी भाग्ने क्रममा झन्डै ६० मिटरमाथि भिरबाट खस्न पुग्दा दुई जनाको हत्यापछि हातमा समातेको खुकुरी चोटका साथै धारिलो ढुंगामा टाउको ठोक्किन पुग्दा गम्भीर चोट लागेर बेहोसी भई घटनास्थलमै मृत्यु भएको अवस्थामा फेला परेका थिए।
यो पनि:
जुन खुकुरीले दुई जनाको हत्या गरे, त्यही खुकुरी लागेर आफूले पनि गुमाए ज्यान
-1742801159.jpg)
