बिहान ४/५ बजिसकेको थियो, आइतबार काठमाडौंको सरस्वती नगरको बाटोमा एक जना पुरूष हिँडिरहेका थिए।
काठमाडौं महानगरपालिका-७ मा उनी कतै मादक पदार्थ सेवन गरेर लट्ठ थिए। गौशाला क्षेत्रका कतिपय गल्लीहरू रातको समयमा लागुऔषध प्रयोगकर्ताको अड्डा जस्तै बन्ने गर्छ।
मापसेले लट्ठिएका ती पुरूष आफूलाई पूर्ण रूपमा सम्हाल्न सक्ने अवस्थामा थिएनन्। उनी हिँडिरहेकै बेलामा एउटा समूहले ती पुरूषलाई देखे।
उनीहरू झापा घर भई गोकर्णेश्वर बस्ने क्षितिज कार्की, सिन्धुपाल्चोक घर भई गोकर्णेश्वर नै बस्ने विशाल तामाङ र अर्का प्रशान्त नामक एक युवक त्यहाँ थिए।
तीन जनाले मिलेर ती पुरूषलाई लुट्ने योजना बनाए। क्षितिजसँग एउटा सानो चक्कु पनि थियो।
उनीहरूले ती पुरूषको एउटा मोबाइल फोन लुटे। त्यसरी लुटिरहेको दृष्य नजिकै बसेर दोलखा घर भई कपन सिमलटार बस्दै आएका युनिक लामा भन्ने नुर्वु शेर्पाले हेरिरहेका थिए।
नुर्वु पनि त्यहाँकै गल्लीहरूमा साथीभाइसँग हिँडिरहन्थे। नुर्वुले त्यो समूहलाई चिनेका भने थिएनन्। तर त्यस दिन उनले लुटेको फोन लुट्ने सोच बनाए।
नुर्वु एक्लै तीन जनासँग भिड्न सक्ने अवस्थामा थिएनन्। तर उनलाई जसोतसो त्यो फोन उनीहरूबाट लुट्ने चाहना थियो।
‘लागुऔषध प्रयोगकर्ताहरू नै हुन् उनीहरू। नुर्वुले अर्को समूहले लुटेको देख्यो। त्यो देखेपछि लुटेकै फोन हो। त्यसलाई पनि लुटौं भनेर सोच बनाएको देखिन्छ,’ अनुसन्धानमा संलग्न एक अधिकारीले भने, ‘तर उनी एक्लैले भिड्न सक्ने अवस्था भएन।’
यसो भएपछि नुर्वुले आफ्ना साथी- काभ्रे घर भई गोकर्णेश्वरकै अमृत भन्ने संघर्ष कार्कीलाई बोलाउँछन्।
अमृत आउँदासम्म उज्यालो हुन थालिसकेको थियो। सरस्वतीनगर, कुमारीगाल क्षेत्रका पसलहरू पनि विस्तारै खुल्न थालिसकेका थिए।
‘उज्यालो हुन थालेको हुँदा पसलहरू पनि खुल्न थालिसकेका थिए,’ ती प्रहरीले भने।
नुर्वु र अमृत दुई जनाले तीन जनासँग भिड्न सक्ने र धम्क्याएरै लुट्न सक्ने सोच बनाए।
करिब ६ बजेतिर उनीहरू कुमारीगालमा पुगे।
त्यहाँ पुगेर नुर्वुले क्षितिजको समूहसँग भने- ‘तैँले फोन लुटेको मैले देखेको छु। त्यो फोन हामीलाई दे।’
क्षितिजको समूहले पनि फोन दिन इन्कार गर्यो।
‘त्यहाँ भर्खरैका किशोरहरूबीच इगोको समस्या देखिन्छ। एकाएक गएर फोन माग्दा उनीहरू दुई समूहबीच झगडा गर्ने मनसाय देखिन्छ,’ ती अधिकारीले भने, ‘एकाएक दुई पक्षबीच झडप सुरू हुन्छ।’
प्रहरीकाअनुसार झडपको क्रममा सुरूमै क्षितिजले चक्कु निकालेर अमृतको छातीमा एक पटक प्रहार गरेको देखिएको छ।
छातीमा चोट लागेपछि अमृत गल्लीको बाटो हुँदै एक ठाउँ आएर भित्तामा अडेस लगाएर बसे।
उता नुर्वुले आफ्नो साथीलाई छुराले हिर्काएको भनेर क्षितिजको चक्कु खोसे। उनले उक्त चक्कु खोसेर क्षितिजमाथि नै प्रहार गरे।
क्षितिजको हात, पिँठ्यू र तिघ्रामा चोट लागेको परिसर प्रवक्ता एसपी अपिलराज बोहोराले जानकारी दिए।
एकाएक भएको घटना स्थानीयले देखेका थिए। बोहोराका अनुसार बिहान ६:०५ बजे प्रहरीलाई खबर पुगेको थियो।
खबर भएको पाँच/सात मिनेटमै प्रहरी घटनास्थलमा पुग्यो।
‘घटना भएपछि प्रहरी नै पुगेर ती दुबै पक्षका घाइतेहरूलाई गाडीमा हालेर अस्पताल लगियो,’ एसपी बोहोराले भने।
भित्तामा अडेस लगाएर बसेका अमृत अचेत भइसकेका थिए। उनी र क्षितिजलाई प्रहरीले काठमाडौं मेडिकल कलेज पुर्यायो।
तर अस्पताल पुर्याएपछि अमृतलाई चिकित्सकले मृत घोषणा गरे।
‘चोट सानो छ। तर चक्कुले ठीक मुटुमै छोएको छ। जसकारण अमृतको मृत्यु भएको हो,’ घटनास्थलमा पुगेका एक प्रहरीले भने, ‘क्षितिजलाई गहिरो चोट भने लागेको छैन।’
घटना भएपछि प्रहरीले त्यही बेला नुर्वु र विशाललाई नियन्त्रणमा लियो। उपचारपछि क्षितिजलाई पनि पक्राउ गरी अनुसन्धान थालेको छ।
अर्का प्रशान्त भन्ने व्यक्ति भने फरार छन्। उनको खोजी भइरहेको एसपी बोहोराले जानकारी दिए।
‘यो घटनालाई हामीले समाजको बिम्बको रूपमा पनि हेरेका छौं। लुटेको फोनलाई फेरि अर्कोले लुट्न खोजेपछि यसरी एक जनाको ज्यान समेत गएको छ,’ उनले भने।
प्रहरीले घटनास्थलबाट चक्कु पनि बरामद गरेको छ। प्रहरीका अनुसार मृतक अमृतको शव पोष्टमर्टमको लागि त्रिवि शिक्षण अस्पतालमा लगिएको छ। अमृत केही महिनाअघि मात्रै दुबईबाट फर्किएको पनि प्रहरीले जनाएको छ।
उनी यसअघि पनि प्रहरीको निगरानीमा परिसकेका व्यक्ति थिए।
यसबारे प्रहरी वृत्त गौशालाले थप अनुसन्धान अघि बढाएको जनाएको छ। जिल्ला अदालत काठमाडौंबाट पाँच दिन हिरासतमा राख्न प्रहरीले अनुमति समेत लिएको छ।
