काठमाडौंको बुढानीलकण्ठमा अनलाइन बेटिङ गराएको आरोपमा प्रहरीले २३ जनालाई पक्राउ गरेको छ।
जिल्ला प्रहरी परिसर काठमाडौंको टोलीले आइतबार बुढानीलकण्ठ नगरपालिका वडा नम्बर ३ स्थित घरमा छापा मारेर २३ जनालाई पक्राउ गरेको थियो। यसरी काठमाडौंमा अनलाइन बेटिङ खेलाउनेमा भारतीय नागरिक सक्रिय रहेको प्रहरीको अनुसन्धानमा देखिएको हो।
हाल पक्राउ परेकाहरू पनि भारतको बिहारस्थित बांका जिल्लाको रहेको प्रहरीले जनाएको छ।
परिसरका प्रमुख एसएसपी विश्व अधिकारीको नेतृत्वमा खटिएको टोलीले घरमा छापा मारेको थियो। एक घरमा बेटिङको खेल खेलाउँदै आएको सूचना पाएपछि परिसरको टोली त्यहाँ पुगेको हो।
छापा मारेपछि उक्त घरबाट ८८ वटा मोबाइल फोन बरामद गरेको छ। १० वटा ल्यापटप, ८१ हजार नगद पनि बरामद गरेको एसएसपी विश्व अधिकारीले जानकारी दिए।
उनका अनुसार उक्त समूहले सञ्चालन गर्दै आएको कामबारे अनुसन्धान जारी छ।
प्रहरीको प्राविधिक टोलीले मोबाइल फोन र ल्यापटपमा प्रयोग हुँदै आएका एपहरूको र त्यसका कारोबारबारे अनुसन्धान अघि बढाएको छ।
‘राति अबेरमात्रै मानिस ल्याएको हुनाले सबै विवरण लिइसकेका छैनौं। अहिले बरामद भएका डिभाइसमा पनि के छ भनेर प्राविधिक टोलीले हेर्दैछ,’ एसएसपी अधिकारीले भने।
उनीहरूले ठूलो संख्यामा कारोबार गराउँदै आएको प्रहरीको भनाइ छ। ‘लोटस’ नाम गरेको बेटिङ साइटमार्फत् सट्टेबाजी गराउने र विशेषगरी भारतीय नागरिकहरूलाई टार्गेट गर्ने प्रारम्भिक अनुसन्धानमा देखिएको हो।
उनीहरूले बुढानीलकण्ठको दोर्जे लामाको घर भाडामा लिएर बेटिङ गराउँदै आएका थिए।
उनीहरूमाथि प्रहरीले मुलुकी अपराध संहिता २०७४को दफा १२५ अनुसार कैले सट्टेबाजी गर्नु वा गराउन नहुने कसुरअन्तर्गत् अनुसन्धान अघि बढाएको छ। उक्त कसुर अनुसार बिगो रकम जफत गरी कसुर गर्नेलाई एक वर्षसम्म कैद र १० हजार जरिवानासम्म हुने कानूनी प्रावधान छ।
-1739179901.jpg)
