राष्ट्रिय सूचना प्रविधि केन्द्रका तत्कालीन कार्यकारी निर्देशक सुनिल पौडेलसहित दुई जनाविरूद्ध भ्रष्टाचारको मुद्दा दायर भएको छ।
अख्तियार दुरूपयोग अनुसन्धान आयोगले पौडेल र दीपक आनन्दविरूद्ध बिहीबार विशेष अदालतमा भ्रष्टाचारको मुद्दा दायर भएको हो।
आनन्द एफ फाइभ कम्पनीका लागि नेपाली प्रतिनिधि हुन्। उनी भारतीय नागरिक रहेको अख्तियार प्रवक्ता नरहरि घिमिरेले जानकारी दिए।
उनीहरूविरूद्ध केन्द्रका लागि ‘सेक्युरिटी अप्लायन्स र नेटवर्क इक्विपमेन्ट’ को खरिद गर्दा भ्रष्टाचार गरेको आरोपमा मुद्दा दायर भएको हो।
अख्तियारले उनीहरूविरूद्ध तीन करोड ८ लाख ५० हजार ४ सय बिगो र जरिवाना मागदाबी गरेको छ। त्यस्तै ६ वर्षदेखि आठ वर्षसम्म कैद सजाय मागदाबी गरेको छ।
पौडेलको हकमा केन्द्रको कार्यकारी निर्देशकमा नियुक्त भएर पनि भ्रष्टाचार गरेको भन्दै थप सजायको मागदाबी पनि गरिएको छ।
अख्तियारले दायर गरेको मुद्दामा दुई जनाबीच भएको घुस लेनदेनको संवाद समेत प्रस्तुत गरेको छ। दुई जना बीचको मिलेमतोमा घुस लेनदेन भएको अनुसन्धानमा देखिएको हो।
यसरी भएको थियो घुस लेनदेन:
राष्ट्रिय सूचना प्रविधि केन्द्रले आर्थिक वर्ष २०७४/७५ मा एउटा बोलपत्र आह्वान गरेको थियो।
‘सप्लाई, डेलिभरी एन्ड इन्स्टलेसन अफ सेक्युरिटी अप्लायन्स एन्ड नेटवर्क इक्विपमेन्ट’ को खरिद गर्नका लागि भनेर बोलपत्र आह्वान भएको थियो। तर यो खरिद प्रक्रियामा भ्रष्टाचार भएको भन्दै अख्तियारमा उजुरी परेको हो।
सन् २०१८ मार्च २७ गते सामान खरिद गर्नका लागि पौडेलले आनन्दसँग लागत अनुमानको आधारमा तीन वटा कम्पनीहरूको कोटेशन मागे।
‘मलाई तीन वटा कम्पनीबाट खरिद गर्दा लाग्ने लागतको कोटेशन चाहियो,’ पौडेलले ह्वाट्सएपमा आनन्दलाई मेसेज गरे।
तीन वटा कम्पनीहरू: इन्स्टासेफ टेक्नोलोजिज प्रालि बैंगलौर, एक्सक्लुसिभ नेटवर्क्स एसिया सिंगापुर र टेकडाटा सिंगापुरको कोटेशन माग गरिएको थियो।
त्यसको भोलिपल्ट अर्थात् मार्च २८ मा आनन्दले खरिद गर्ने १२ लाख ५० हजार अमेरिकी डलर बराबरको बिल अफ मटेरियल पौडेललाई पठाएका थिए।
त्यसको जबाफमा पौडेलले भने, ‘१२ लाख अमेरिकी डलर बनाउन डिएनएस फायरवालको मूल्य एक लाख ७५ हजार अमेरिकी डलर भन्दा माथि बढाउने र स्वीच र राउटरको मूल्य घटाउने।’
उनको भनाइ बमोजिम नै आनन्दले मार्च २९ गते पौडेललाई झुटा कोटेशन पठाएको देखिएको हो।
अप्रिल ५ मा आपूर्ति गरिने सामग्रीका कम्पनीहरूले पाउने रकम, बोलपत्रमा नेपालबाट भाग लिने कम्पनीले पाउने रकम र २ लाख ७५ हजार अमेरिकी डलर घुस रकम बाँडफाँट गरेको विवरण पनि पौडेललाई आनन्दले पठाएका थिए।
उक्त घुस रकममा भने सुनिल पौडेलले सहमति जनाएनन्। उनले ४ लाख अमेरिकी डलर माग गरे। तर मार्च ५ देखि ७ बीचमा भएको कुराकानीका आधारमा बार्गेनिङ भई ३ लाख ७५ हजार अमेरिकी डलर लेनदेन गर्ने सहमति भएको अख्तियारले जनाएको छ।
अप्रिल १३ मा सुनिल पौडेलले सामान र लागत अनुमानको विवरणमा स्वीकृति दिए। अप्रिल १५ मा दुई जनाबीच भएको पूर्वसहमति बमोजिम तीन वटा कम्पनीबाट बनेका सामानसँग मेल खानेगरी खरिद गर्न बोलपत्रको सूचना प्रकाशन भएको थियो।
१६ अप्रिलदेखि ५ मे बीचमा दुई जनाबीच इन्स्योरेन्स कस्टमबारे कुराकनी भएको थियो। त्यसैबीच आनन्दले पौडेललाई ३ लाख १० हजार अमेरिकी डलर दिन सकिने भनेपछि पौडेलले पनि त्यसमा सहमति दिएका थिए।
त्यसैगरी मे १३ मा ठेक्कासम्बन्धी कागजात तयारका लागि आनन्द नेपाल आए। उनले ठाकराल वान नेपाल प्रालिका प्रमुख कार्यकारी अधिकृत तथा आपूर्तिकर्ता अष्ट्रल कम्प्युटर्स नेपाल प्रालिका अध्यक्ष कृष्ण गिरीसँग पनि भेटेका थिए।
भोलिपल्ट आनन्दले भने अनुसारको रकम कबोल गरी उक्त अष्ट्रलबाट बोलपत्र पेस भएको अख्तियारको अनुसन्धानमा देखिएको हो।
मे २२ मा करिब लागत अनुमान बराबरको अंक कबोल गरी अष्ट्रलले मात्र बोलपत्रदाताको रूपमा बोलपत्र पेस गरेको थियो। पौडेल आफैले उक्त बोलपत्र स्वीकृतिका लागि सिफारिस गरी मूल्यांकन प्रतिवेदन पेस गरेका थिए।
त्यस्तै ३१ मेमा पौडेलले अष्ट्रलसँग ठेक्का सम्झौता गरे। त्यही दिन आनन्दले डलरको मूल्य नेपाली रूपैयाँको तुलनामा घटेकाले घुस रकम पनि २ लाख ८० हजार अमेरिकी डलर मात्रै दिन सक्ने बताएका थिए।
अष्ट्रलले १५ जुनमा तीन वटा कम्पनीबाट सामान आपूर्ति गर्न १० लाख ५३ हजार ६०४ अमेरिकी डलर लेटर अफ क्रेडिटमार्फत् सिंगापुरमा पठाएको अख्तियारको प्रतिवेदनमा उल्लेख छ।
८ जुलाईमा सामानहरू नेपाल पनि आइपुग्यो।
९ देखि १२ जुलाईबीचमा दुई चरणमा ठेक्काको भुक्तानी समेत भएको थियो।
त्यसपछि आनन्दले १० अगष्टमा पौडेललाई अमेरिका र भारतको बैंक खातामा घुस पठाएको प्रमाण अख्तियारले फेला पारेको छ।
दुई ठाउँमा २८ लाख अमेरिकी डलर भुक्तानी भएको देखिएको हो। जसको नेपाली मूल्य तीन करोड ८ लाख ५० हजार ४ सय रुपैयाँ थियो। त्यस अनुसार नै अख्तियारले उनीविरूद्ध मुद्दा दायर गरेको हो।
