नेकपा एमालेका केन्द्रीय सदस्य ऐन महरविरूद्ध बलात्कार आरोपमा परेको जाहेरीबारे अनुसन्धान अगाडि बढाउन उच्च अदालत पाटनले आदेश दिएको छ।
महरले आफूमाथि बलात्कार गरेको भन्दै अन्नपूर्ण (नाम परिवर्तन) ले दिएको जाहेरीबारे पुनर्विचार गरी थप अनुसन्धान अगाडि बढाउनू भन्दै माघ ९ गते उच्च अदालत पाटनका न्यायाधीश ब्रजेश प्याकुरेल र कृष्णराम कोइरालाको इजलासले आदेश दिएको हो।
अदालतको आदेशसँगै अब पूर्णपाठ आएपछि आफू कानुनी प्रक्रियामा जाने अन्नपूर्णले बताएकी छन्।
अन्नपूर्ण २०८० जेठ २ गते आफूमाथि महरले बलात्कार गरेको भन्दै २०८१ वैशाख २५ गते जिल्ला प्रहरी परिसर काठमाडौं पुगेकी थिइन्। उनका अनुसार त्यति बेला प्रहरीले उनको जाहेरी दर्ता गर्न मानेनन्।
प्रहरीले नमानेपछि अन्नपूर्णले हुलाकमार्फत जाहेरी पठाएकी थिइन्। २०८१ जेठ २४ गते सो जाहेरी जिल्ला सरकारी वकिल कार्यालयले तामेलीमा राख्ने निर्णय गर्यो। कार्यालयले अन्नपूर्णको जाहेरी दरखास्त झुटो, कपोलकल्पित र भ्रामक देखिएकाले मुलुकी फौजदारी कार्यविधि संहिता २०७४ को दफा ११ (२) बमोजिम तामेलीमा राख्ने निर्णय गरेको थियो।
सरकारी वकिल कार्यालयको यो निर्णयविरूद्ध अन्नपूर्ण उच्च अदालत पाटन पुगेकी थिइन्। अदालतले सो निर्णय उल्टाएर अनुसन्धान अगाडि बढाउन बाटो खोलिदिएको हो।
अन्नपूर्ण यही माघ १४ गतेसम् साइबर अपराध ब्युरोको हिरासतमै थिइन्। सामाजिक सञ्जालमा आपराधिक लाभ र साइबर अपराध आरोपमा उनलाई ब्युरोले माघ ८ गते पक्राउ गरेको थियो। सात दिन अनुसन्धानपछि उनी छुटेकी हुन्।
'म हिरासतमै भएकाले प्रकियामा जान पाइनँ,' उनले सेतोपाटीसँग भनिन्, 'अब अदालतको आदेश आयो। पूर्णपाठ आएपछि कानुनी प्रक्रियामा जान्छौं। आफूमाथि बलात्कार भएको जाहेरी दिने प्रक्रियाका लागि पनि ९ महिना कुर्नुपर्यो र पो!
काठमाडौं बस्दै आएकी २८ वर्षीया अन्नपूर्णको मूलघर बझाङ हो। उनका एक छोरा छन्। श्रीमानसँग सम्बन्ध विच्छेद भइसकेको छ।
राजनीतिक यात्रा तय गर्न चाहने अन्नपूर्ण गृहजिल्लाकै केन्द्रीय सदस्य महरसँग सामाजिक सञ्जालमा जोडिएकी थिइन्। यसपछि उनीहरूको भेटघाट र कुराकानी बाक्लिँदै गयो। चिया-कफी भेटघाट भइरह्यो।
अन्नपूर्णले प्रहरीमा पेस गरेको जाहेरी अनुसार उनीहरूको २०७९ फागुन ६ गते काठमाडौंको एक अपार्टमेन्टमा भेट्ने कुरा भयो। साँझ ५/६ बजेतिर आफू अपार्टमेन्ट पुगेको उनले उल्लेख गरेकी छन्।
'फर्किने गरी गएकी थिएँ। कुरा गर्दै जाँदा क्रममा रात पर्यो। त्यसैले त्यहीँ बस्ने कुरा भयो। एकै जिल्लाबासी र राजनीतिज्ञ समेत भएकाले अभिभावक ठानेर बस्न सहमत भएँ,' उनले जाहेरीमा भनेकी छन्, 'महरले पहिले पनि माया-प्रेमका कुरा गर्ने, लोभ-लालच देखाउने कोसिस गरिरहेका थिए। पहिला त्यसलाई ध्यान दिएकी थिइनँ। त्यो दिन भने तिमी राम्री लाग्छ, प्रेम गर्छु भन्दै शरीर छुनुभयो।'
महरले शरीरका गोप्य भागमा छुँदै आफ्नो इच्छा विपरीत सम्बन्ध राखेको पनि उनले जाहेरीमा उल्लेख गरेकी छन्।
जाहेरी अनुसार त्यस दिन राती भएकाले उनी त्यहीँ बसिन्। भोलिपल्ट पनि उनले आफूमाथि भएको घटना कसैलाई सुनाउन सकिनन्। समाजमा बेइज्जत हुने डरले कसैलाई नभनेको उनले बताएकी छन्।
त्यो पीडा उनले दबाउन खोजिरहिन्। झन्डै दुई महिनापछि, चैत २६ गते महरले फोन गरी आफूलाई एचआइभी पोजेटिभ भएको छ, तिमी पनि स्वास्थ्य जाँच गर्नू भनेको उनले बताइन्।
'महरले तिमी छिटोभन्दा छिटो चेक गर्नू भनेपछि म आत्तिएँ। हतार हतार एचआइभी परीक्षण गराएँ,' उनले भनेकी छन्, 'मेरो रिपोर्ट नेगेटिभ आयो। तर डाक्टरहरूले तत्काल नेगेटिभ आए पनि पछि पोजेटिभ देखाउन सक्छ भने। यसपछि मैले केही सोच्नै सकिनँ।'
यही कुराले आफूलाई तनाव भएर मानसिक रोगी भएको र औषधि सेवन गर्न थालेको उनले जाहेरीमा बताएकी छन्। तर आफ्नो र परिवारको बेइज्जत हुने डरले महरबाट आफूलाई टाढै राखिन्।
आफूमाथि भएको घटना दबाउन खोजिरहेकी अन्नपूर्णलाई लगभग ३ महिनापछि फेरि महरको फोन आयो। २०८० जेठ २ गते महरले फोन गरेर आफूलाई एचआइभी लागेको हो कि होइन भन्ने प्रमाण देखाइदिने भन्दै अन्नपूर्णलाई आफ्नो कार्यालयमा भेट्न बोलाए।
'झुटो बोलेका हुन् कि साँचो हो भन्ने लागिरहेको थियो। त्यसैले एकपल्ट प्रमाण हेर्न मन भयो,' अन्नपूर्णको जाहेरीमा भनिएको छ, 'पोजेटिभ भएमा ५/७ महिनापछि भए पनि देखिने भनिएकाले तथ्य बुझ्न गएँ।'
महरले कार्यालयमा कर्मचारीहरू पनि हुन्छन् भनेकाले उनी साँझ ४/५ बजेतिर भेट्न पुगिन्। तर महर एक्लै थिए। कर्मचारीहरू खै भनेर अन्नपूर्णले महरलाई सोध्दा गइसके भनेका थिए।
'सोफामा बसेकी थिएँ। एक्कासि छेउमा आएर मेरो संवेदनशील अंगमा छुनुभयो। जबरजस्ती सम्बन्ध राख्नुभयो,' उनले जाहेरीमा उल्लेख गरेकी छन्, 'मैले प्रतिकार गर्दागर्दै पनि दोस्रो पटक ममाथि जबरजस्ती करणी भयो।'
उनका अनुसार महरले निरन्तर गलत हर्कत गरेपछि उनी चिच्याएकी, कराएकी थिइन्। तर तिम्रै बेइज्जत हुन्छ भनेर महरले धम्की दिएपछि चुपचाप बसेको जाहेरीमा उल्लेख छ।
दोस्रो पटक पनि आफ्नो इच्छा विपरीत जबरजस्ती करणी गरेपछि उनले कानुनी उपचारमा जाने निधो गरिन्। त्यो कुरा थाहा पाउँदा महरले प्रहरीमा गएको खण्डमा परिवार असुरक्षित हुन्छ भन्दै धम्की दिएको उनले बताएकी छिन्।
'शक्तिको आडमा जे पनि गर्न सक्ने डरले केही दिनसम्म प्रहरीमा जाने हिम्मत नै गरिनँ,' उनले भनेकी छन्।
त्यसबीच आफ्नो मोबाइल चोरी भएको र 'अडिओ वार्ता' सार्वजनिक भएको भनिएको छ।
२०८० मंसिरमा महर र अन्नपूर्णबीचको वार्ता भन्दै एक अडिओ सामाजिक सञ्चालमा सार्वजनिक भएको थियो। करिब ८ मिनेटको अडिओमा महिलाले घटना सार्वजनिक गर्न खोजेपछि पुरूषले दबाब र धम्की दिएको आरोप छ।
'कात्तिक २४ गते एक महिलालाई प्रयोग गरेर, मेरो कोठामा पठाएर, मासुमा नशालु पदार्थ मिसाएर मोबाइल चोरी गरिएको थियो,' जाहेरीमा भनिएको छ, 'मोबाइलमा भएका प्रमाण नष्ट गरिएको थियो।'
ती महिला आफू र महर दुवैकी चिनजानकी भएको अन्नपूर्णले बताइन्।
यी घटनाबारे कुराहरू सार्वजनिक हुन थालेपछि अन्नपूर्णका श्रीमानसँग सम्बन्ध विच्छेद भएको थियो।
अन्नपूर्णले फेसबुक लाइभमा बसेर महर र अरू व्यक्तिहरूबारे खुलाएकी थिइन्। सामाजिक सञ्जालमार्फत विभिन्न व्यक्तिको चरित्रहत्या गरेको आरोपमा उनी पक्राउ परिन्।
त्यति बेला साइबर अपराध मुद्दामा जिल्ला अदालत काठमाडौंबाट दोषी ठहर हुँदै फागुन ३० गते अन्नपूर्णलाई सात दिन कैद ३० हजार जरिवाना र पीडितलाई डेढ लाख क्षतिपूर्ति भराउने फैसला भएको भएको थियो।
२०८१ वैशाख पहिलो साता उनी उस्तै प्रकृतिको मुद्दामा पुनः पक्राउ परिन्।
'दुई/दुई पटक मुद्दा खेपेपछि ऐन महरको धम्की बेवास्ता गर्दै प्रहरीकहाँ पुगेकी हुँ,' उनले भनिन्।
उनी दोस्रो पटक घटना भएको ११ महिनापछि, अर्थात् २०८१ वैशाख २५ गते प्रहरीकहाँ जाहेरी दिन पुगेकी थिइन्। प्रहरीले दर्ता गर्न नमानेपछि हुलाकमार्फत पठाएको जाहेरी सरकारी वकिल कार्यालयले २०८१ जेठ २२ गते पाएको थियो। जिल्ला प्रहरी परिसर काठमाडौंका प्रहरी निरीक्षकले २० दिन अनुसन्धान गरी २२ गते कार्यालयमा मिसिल बुझाए।
सरकारी वकिल कार्यालयले जाहेरी तामेलीमा राख्यो।
कार्यालयले गरेको निर्णय पत्रमा उल्लेख भए अनुसार, मिसिल बुझाएको दुई दिनपछि महरले आपराधिक लाभ मुद्दामा अन्नपूर्णविरूद्ध जाहेरी दरखास्त दिएका थिए। सो जाहेरी दर्ता भएर अन्नपूर्णउपर काठमाडौं जिल्ला अदालतबाट पक्राउ पुर्जी जारी भएको थियो। अडिओ (अन्नपूर्ण र महरबीचको संवाद भएको भनिएको) अन्नपूर्णले कृत्रिम रूपमा सम्पादन गरेको र आफ्नो चरित्र हत्या गर्ने उद्देश्य रहेको महरले उल्लेख गरेका थिए। त्यही कारण अन्नपूर्णको जाहेरी दरखास्त प्रथम दृष्टिमै झुटो, कपोलकल्पित र भ्रामक देखिएकाले तामेलीमा राख्ने निर्णय गरेको सरकारी वकिल कार्यालयले बताएको छ।
यो निर्णयविरूद्ध अन्नपूर्ण उच्च अदालत पाटन पुगेकी थिइन्। त्यहाँबाट कानुनी प्रक्रिया अगाडि नबढेपछि २०८१ मंसिरमा उनका बुबा माइतीघर मण्डलमा 'बलात्कारी ऐन महरा' लेखिएको ब्यानरसहित धर्ना बसे। महरकी श्रीमतीले श्रीमानको चरित्र हत्या गर्न खोजिएको भन्दै उक्त ब्यानर हटाउन भन्दै विरोध गरिन्। यही क्रममा दुई पक्षबीच झडपसमेत भयो।
मंसिर पहिलो साता अन्नपूर्ण आफ्नो मुद्दाबारे बुझ्न उच्च अदालत पुगेकी थिइन्। त्यही क्रममा उनले अदालत परिसरमै विष सेवन गरिन्। तत्कालै पुल्चोकस्थित अल्का अस्पतालमा उनको उपचार गरियो। यसपछि पनि उनी रोकिइनन्। ऐन महर र रक्षा बममाथि आरोप लगाउँदै सामाजिक सञ्जालहरूमा लेख्ने र भिडिओमा बोल्ने काम गरिरहिन्। त्यही क्रममा माघ ८ गते पुनः पक्राउ परेकी थिइन्। उनी हिरासतमा रहेकै बेला उच्च अदालतले उनको जाहेरीमा अनुसन्धान गर्न बाटो खोलिदिएको हो।
अन्नपूर्णको पक्षमा बहस गर्दै आएका अधिवक्ता इन्द्रप्रसाद अर्यालले यो जाहेरीमा कानुनी प्रक्रिया अगाडि नबढाउनु गलत भएको बताए।
'उनी पीडित हुन् कि होइनन् भन्ने अनुसन्धान गर्नुपर्यो। तर यसरी अनुसन्धान नै नगरी टुंग्याउन हुँदैन,' अधिवक्ता अर्यालले भने।
ऐन महर २०७८ मंसिरमा एमाले केन्द्रीय सदस्य मनोनीत भएका थिए। अन्नपूर्ण र उनीबीचको भनिएको अडिओ सार्वजनिक भएसँगै पाटीले उनलाई एक पटक निलम्बन गरेको थियो। पछि फेरि सचिवालय बैठकबाट जिम्मेवारीमा फर्काइएको हो।क
-1719204978.jpg)
