साहारा चितवन बहुउद्देश्यीय सहकारी संस्थाको रकम अपचलनको मुद्दामा गोरखा मिडिया नेटवर्क प्रालिका ३ जना सञ्चालकविरूद्ध मात्रै संगठित अपराधको मुद्दा चलाइएको छ।
सञ्चालकहरू जिबी राई, छविलाल जोशी र कुमार रम्तेललाई ठगीसहित संगठित अपराधको पनि मुद्दा लगाएर सरकारी वकिलको कार्यालयले चितवन जिल्ला अदालतमा अभियोजन गरेको छ। प्रबन्ध निर्देशक रवि लामिछानेलाई भने ठगीको मात्रै मुद्दा लगाइएको छ।
साहारा सहकारीबाट गोरखा मिडियामा १० करोड ८० लाख १८ हजार १५१ रुपैयाँ गएको देखिएको छ। त्यो रकम चार जना सेयर सदस्यलाई दामासायी रूपमा बिगो तोकिएको छ। यसअनुसार सबैको भागमा २ करोड ७० लाख ४ हजार ५३७ रुपैयाँ बिगो हुन आउँछ।
जिल्ला न्यायाधिवक्ता शान्तिराज लुइँटेलले रविले साहारा चितवन सहकारीमार्फत् गोरखा मिडियामा गएको रकमको चेक काटेको मात्रै भेटिएको बताए।
‘उनी साहारा सहकारीका सदस्य, सञ्चालक भएको, यहाँको रकम अन्य कम्पनीमा लैजाने कार्यमा संलग्न भएको देखिएन,’ लुइँटेलले भने, ‘अन्य तीन जना संलग्न देखिएकाले ठगी र संगठित अपराध दुबै मुद्दा चल्यो।’
सरकारी वकिलको कार्यालयले मंगलबार साहारा चितवन सहकारीको रकम अपचलनमा ३२ जना र ६ वटा कम्पनीविरूद्ध जिल्ला अदालतमा मुद्दा पेस गरेको हो। ३२ मध्ये १२ जनालाई ठगी र संगठित अपराध दुबै मुद्दा चलाइएको अदालतका सूचना अधिकारी अमृत विश्वकर्माले जानकारी दिए। अन्यको विरूद्ध ठगीको मात्रै मुद्दा छ।
३२ जनामध्ये जिबी राईसहितका १७ जनाको विरूद्ध गत असोज ८ गते सरकारी वकिल कार्यालयले मुद्दा दर्ता गरेको थियो। सरकारी वकिल कार्यालयले थप अनुसन्धानका गर्न निर्देशन दिएपछि जिल्ला प्रहरी कार्यालयले लामिछानेसहित थप १५ जना र ६ वटा कम्पनीहरूसहित पूरक अनुसन्धानको प्रतिवेदन बुझाएको थियो।
साहारा चितवन सहकारीको कुल बचत रकम ५२ करोड ३२ लाख ८५ हजार ३०८ रुपैयाँबाट गोरखा मिडिया, नेचर हर्ब्स इन्टरनेसनल प्रालि, जिबी ग्रुप अफ कम्पनी, स्प्रिङ उड रियल स्टेट र नेचर नेस्ट प्रालिमा गएको भेटिएको ४३ करोड १४ लाख ४९ हजार ९२८ रुपैयाँ प्रतिवादीहरूको नाममा बिगो तोकेको छ।
सहकारी संस्थामा ३८ करोड ९ लाख ७९ हजार १७७ रुपैयाँ बचत जम्मा गरेका ४५६ जनाले रकम फिर्ता पाउनुपर्ने माग राखेर जाहेरी दिएका थिए। सो रकम र बाँकी १३ करोड ४२ लाख ६ हजार १३१ रुपैयाँ बचत रकमपछि दाबी भएको अवस्थामा पनि प्रतिवादीबाट फिर्ता गराउनुपर्ने अभियोजन पत्रमा उल्लेख छ।
अदालतका स्रेस्तेदार विष्णुप्रसाद आचार्यले प्रतिवादीहरूमध्ये कोही उपस्थित भएपछि अदालती प्रक्रिया सुरू हुने बताए।
‘भोलि उपस्थित हुनुभयो भने भोलि नै बयान सुरू हुने र बहस अनि थुनछेक आदेश हुन्छ,’ उनले भने।
राष्ट्रिय स्वतन्त्र पार्टीका केन्द्रीय सदस्य राजन गौतमले भने लामिछाने बिहीबार जिल्ला अदालतमा उपस्थित हुने जानकारी दिए।
