नेपाली साहित्य, कला र सांस्कृतिक आदानप्रदानको प्रवर्द्धनमा अग्रणी अनु बुक्सले श्रीपञ्चमीको सन्दर्भ पारेर सामुदायिक पुस्तक मेला आयोजना गरेको छ।
ललितपुरस्थित अनु बुक्स परिसरमा आयोजित मेलामा पुस्तक प्रेमी, सांस्कृतिक अभियन्ता र स्थानीयको सहभागिता रह्यो।
मेलामा निरञ्जन खतिवडा र रजनी गजमेर नेतृत्वको कक्षालयको टोलीले, बालबालिकाहरूलाई कथा वाचनमार्फत मोहित पार्दै साक्षरताको महत्त्व र आजीवन सिकाइलाई प्रेरित गरेको थियो।
कथालय इन्ककी सुनीति अमात्य र कक्षालयकी मोनिता गुरूङले सांस्कृतिक साहित्यले नेपालको समृद्ध सम्पदालाई जोगाउन र प्रवर्द्धन गर्न महत्त्वपूर्ण भूमिका खेल्ने कुरामा जोड दिएका थिए।
मुगु जिल्लाको काव्यिक समूहको कविताले समुदायमा उपेक्षित आवाजहरू समेटेर समावेशितामा जोड दिएको थियो।
बुक हिलद्वारा आयोजित अर्को अन्तर्क्रियात्मक सत्रमा, लेखक श्रीधर खनालले आफ्नो नवीनतम कृति साबर्नीः द रोबोटिक फिक्सनको चर्चा गर्दै साहित्यले नवप्रवर्तनमा पुर्याउने भूमिकाबारे छलफल गरेका थिए।
हसिना शाक्यको नेतृत्वमा भएको सत्रमा सहभागीहरूले ध्वनि उपचारको उपचारात्मक शक्ति अनुभव गर्न पाए।
कफी एट अनु बुक्सका संस्थापक अमिर थापाको परिकल्पनामा आयोजित मेलालाई संयुक्त राष्ट्रसंघको दिगो विकास लक्ष्यहरूसँग जोडिएको थियो।
पुस्तक मेलामा ख्यातिप्राप्त कलाकार र लेखक लैनसिंह बाङ्देलको योगदानमाथि समर्पित प्रस्तुति पनि राखिएको थियो। नेपाली सांस्कृतिक सम्पदालाई सम्मान गर्दै बाङ्देलको कलाको सीमित संस्करण क्यानभास प्रिन्टमा उतारिएको थियो ।
दिवङ्गत फोटोग्राफर चुङ्बा शेर्पाको मनमोहक वन्यजन्तु फोटोग्राफी प्रदर्शनीले वातावरणीय संरक्षणको महत्वलाई उठाएको थियो।
नेपालको सांस्कृतिक पहिचान र दिगो विकासप्रतिको सामूहिक जिम्मेवारीको रूपमा मेला आयोजना गरिएको कफी एट अनु बुक्सका संस्थापक अमिर थापाको भनाइ छ। मेलाले सम्पदा संरक्षण, समावेशिता प्रवर्द्धन र शिक्षाको विकासबारे छलफलको सुरूआत गरेको छ।
काठमाडौंका प्रमुख पुस्तक पसल मध्यको एक अनु बुक्सले साहित्य, कला र संस्कृति मार्फत समाजमा सकारात्मक प्रभाव पार्न निरन्तर प्रयास गरिरहेको छ।
