ललितपुरमा सट्टेबाजी खेलाएको आरोपमा प्रहरीले २४ जनालाई पक्राउ गरेको छ।
ललितपुर महानगरपालिका वडा नम्बर २ सानेपास्थित दुई वटा घरबाट प्रहरीले २४ जनालाई पक्राउ गरेको काठमाडौं उपत्यका अपराध अनुसन्धान कार्यालयका एसपी काजीकुमार आचार्यले जानकारी दिए।
विश्वभर सञ्चालन हुने अनलाइन गेमका आठ वटाभन्दा बढी बेटिङ साइटको प्रयोग गरी सट्टेबाजी (बेटिङ) गराएको आरोप उनीहरूमाथि छ।
अनलाइन बेटिङको काम भइरहेको छ भन्ने सूचनाका आधारमा प्रहरी खटिएको थियो। जिल्ला प्रहरी परिसर ललितपुर र मातहतको टोली खटिएर सानेपामा प्रहरीले छापा मारेको थियो।
दुई वटा घरलाई भाडामा लिएर व्यवसायिक तवरले अनलाइन बेटिङ खेलाउने काम गरिरहेका १० जना भारतीय नागरिक र १४ जना नेपालीसहित २४ जनालाई प्रहरीले शनिबार पक्राउ गरेको हो।
उनीहरूको ल्यापटप लगायतमा अनुसन्धान गर्दा तीन अर्ब ४ करोड ७३ लाख ५६ हजार ६१२ रुपैयाँको कारोबार गरेको भेटिएको एसपी आचार्यले बताए।
उनीहरूमाथि मुलुकी अपराध संहिता २०७४ अनुसार जुवा खेल्न वा खेलाउन नहुने र विदेशी विनिमय नियमित गर्ने ऐन अनुसार अनुसन्धान अघि बढाएको छ।
जिल्ला प्रहरी परिसर ललितपुरले उनीहरूमाथि थप अनुसन्धान गर्ने भएको छ।
